ގުޖުރާތުގައި ފެންބޮޑުވެ 35 މީހުން މަރުވެއްޖެ

އިންޑިއާގެ ގުޖުރާތު ސްޓޭޓަށް ފާއިތުވި ތިން ދުވަހުގެ ތެރޭގައި ބޯކޮށް ވާރޭވެހި ފެންބޮޑުވުމުގެ ސަބަބުން ބޮޑެތި ގެއްލުންތަކާ ކުރިމަތިލާން ޖެހި  35  މީހުންނަށް ވުރެ ގިނަ މީހުން މަރުވެއްޖެއެވެ.

އިންޑިއަން އެކްސްޕްރެސް ނޫހުން ރިޕޯޓުކުރި ގޮތުގައި، އެ ސްޓޭޓްގެ އެކި ކަންކޮޅުތަކުގައި މިހާތަނަށް 35 މީހުން މަރުވެފައިވާ ކަމަށް ލަފާކުރެވެއެވެ. ނަމަވެސް، ސަރުކާރުގެ ރަސްމީ އަދަދަކީ 28 މީހުންނެވެ.

ސަރުކާރު އޮފިޝަލުން ދެއްވި މަޢުލޫމާތުގައިވާ ގޮތުން، މަރުވި މީހުންގެ ތެރެއިން 13 މީހުން މަރުވެފައިވަނީ ގެނބިގެންނެވެ. އަނެއްބައި މީހުން މަރުވެފައިވަނީ ގަސްތަކާއި ގެތައް ގައިމައްޗަށް ވެއްޓުމުގެ ސަބަބުންނެވެ. މި ވިއްސާރައިގެ ސަބަބުން ކޯރުތައް ފުރި ބަންޑުންވެ، 30,000 އަށްވުރެ ގިނަ މީހުން ވަނީ ގެދޮރު ދޫކޮށް ގޮސްފައެވެ.

ރިލީފް އޮޕަރޭޝަންތަކުގައި ހަރަކާތްތެރިވާ އަސްކަރިއްޔާގެ އޮފިޝަލުން ވަނީ 1,800 އަށްވުރެ ގިނަ މީހުން ސަލާމަތް ކޮށްފައެވެ. މި އޮޕަރޭޝަންތައް ކުރިއަށްދަނީ ދުވާލާއި ރޭގަނޑު މެދުކެނޑުމެއް ނެތި ކަމަށް އޮފިޝަލުން މަޢުލޫމާތު ދެއެވެ. އިތުރު ގެއްލުންތައް ކުޑަކުރުމަށް ސަރުކާރުން ވަނީ ހުރިހާ ފަރާތްތަކަށް ވެސް ސަމާލުވުމަށް އިލްތިމާސްކޮށްފައެވެ.

ސްޓޭޓުގެ ހުޅަނގު އައްސޭރިފަށަށް އިތުރަށް ބޯކޮށް ވާރޭ ވެހޭނެ ކަމަށް މޫސުމާ ބެހޭ ގައުމީ އިދާރާއިން ވަނީ އަންގާފައެވެ. މިކަމުގެ ސަބަބުން އިތުރު ގެއްލުންތަކާ ކުރިމަތިލާން ޖެހިދާނެ ކަމަށް ވެސް ވަނީ އިންޒާރު ދީފައެވެ.

މި ވިއްސާރައިގައި އެންމެ ބޮޑަށް ގެއްލުން ލިބުނީ ވަޑޯދްރާ ސިޓީއަށެވެ. މި ސިޓީގައި ގިނަ އަދަދެއްގެ މަގުތައް ވަނީ ފެނު އަޑީގައެވެ. އަދި ގާތްގަނޑަކަށް 1,000 އަވަށަކުން ކަރަންޓު ކެނޑިގެން ގޮސްފައިވެއެވެ. މިކަމުގެ ސަބަބުން އާންމު ދިރިއުޅުމަށް ވަރަށް ބޮޑެތި ދަތިތަކާ ކުރިމަތިލާން ޖެހިފައިވާ ކަމަށް ރައްޔިތުން ބުނެއެވެ.