ގަވާއިދާ ޚިލާފަށް އުޅޭ ބިދޭސީން ހޯދުމުގެ މަސައްކަތް ސިޓީ ކައުންސިލުން ފަށައިފި

މާލޭ ސަރަހައްދުގައި ގަވާއިދާ ޚިލާފަށް ހަރަކާތްތެރިވަމުން އަންނަ ބިދޭސީން ހޯދުމަށް މާލޭ ސިޓީ ކައުންސިލުން މަސައްކަތް ފަށައިފިއެވެ.

މި މަސައްކަތުގެ ދަށުން ކައުންސިލުން ވަނީ މާލޭގެ އެކި ސަރަހައްދުތައް ބަލައި ފާސްކުރުމުގެ މަސައްކަތް ފަށާފައެވެ. މިކަމަށްޓަކައި ކައުންސިލުގެ ކޮމިއުނިޓީ އެންގޭޖްމަންޓް އޮފިސަރުން ވަނީ މާލޭގެ އެކި ސަރަހައްދުތަކުގައި ހަރަކާތްތެރިވަން ފަށާފައެވެ.

މިގޮތުން ކައުންސިލުން ބުނެފައިވަނީ މާލޭގައި ގަވާއިދާ ޚިލާފަށް ހުއްދަ ނެތި ކާބޯތަކެތި ވިއްކަމުންދިޔަ ތަނެއް ހޯދައި، އެކަން އިމިގްރޭޝަނަށް ރިޕޯޓު ކޮށްފައިވާ ކަމަށެވެ.

މީގެ އިތުރުން ހުރަވީ ގޯޅީގައި ގަވާއިދާ ޚިލާފަށް ގެސްޓްހައުސް ވިޔަފާރި ކުރަމުންދާތީ، އެތަން ޗެކުކުރިއިރު ސިނގިރޭޓާއި އެނަރޖީ ޑްރިންކް ވިއްކަމުންދާކަން ފާހަގަކުރެވި އިމިގްރޭޝަނަށް ރިޕޯޓު ކޮށްފައިވާ ކަމަށްވެސް ކައުންސިލުން ބުނެފައިވެއެވެ.

ސަރުކާރުން ވަނީ މާލޭ ސަރަހައްދުގައި ގަވާއިދާ ޚިލާފަށް ހަރަކާތްތެރިވަމުން އަންނަ ބިދޭސީން ހޯދުމަށް ބޮޑު އޮޕަރޭޝަނެއް ފަށާފައެވެ. މި އޮޕަރޭޝަނުގެ ތެރެއިން މިހާތަނަށް 3،322 ބިދޭސީން ޑީޕޯޓު ކޮށްފައިވާ ކަމަށް އިމިގްރޭޝަނުން ބުނެފައިވެއެވެ.