ޑިޕްލޮމެޓިކް މިޝަންތަކުގެ ކައިރީގައި އެއްވެ އަޑުއުފުލުމުގެ ތުހުމަތުގައި ދެ އަންހެނުން ހައްޔަރުކޮށްފި

އިޒްރޭލުން ފަލަސްތީނަށް ދެމުންގެންދާ ހަމަލާތަކާ ގުޅިގެން، ޑިޕްލޮމެޓިކް މިޝަންތަކުގެ ކައިރިއަށް ގާނޫނާ ޚިލާފަށް އެއްވެ އަޑުއުފުލައި ސަފީރުންނަށް އުނދަގޫކުރަމުންދިޔަ ކަމުގެ ތުހުމަތުގައި ދެ އަންހެނުން މިއަދު ހައްޔަރުކޮށްފިއެވެ.

ފުލުހުން މިރޭ ނެރުނު ބަޔާނެއްގައި ބުނެފައިވަނީ ޑރ. ޝަޒްރާ އިބްރާހީމް އާއި އާއިޝަތު ޝާދިޔާ ހައްޔަރުކޮށްފައިވަނީ މިއަދު މެންދުރުފަހު 1 ޖެހިއިރު ކަމަށެވެ. އެ ދެ މީހުން ހައްޔަރުކޮށްފައިވަނީ ސުލްހަވެރިކަމާއެކު އެއްވެ އުޅުމުގެ ގާނޫނާ ޚިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި ބޭއަދަބީ ބަހުރުވައިން މުޢާމަލާތްކޮށްފައިވާތީ ކަމަށް ފުލުހުން ބުނެފައިވެއެވެ.

މީގެއިތުރުން، ޑިޕްލޮމެޓިކް މިޝަންތަކަށް ހުރަސްއެޅޭ ގޮތަށް ޢަމަލުތައް ބަހައްޓައި، ވަކި ސަފީރަކަށް އުނދަގޫކުރުމުގެ ޢަމަލުތަކެއް ހިންގަމުން ދިޔުމުން ސުލްހަވެރިކަމާއެކު އެ ސަރަޙައްދުން ދިއުމަށް އެންގުމުންވެސް އެކަމަށް އިންކާރުކޮށް ފުލުހުންގެ ވާޖިބަށް ހުރަސްއެޅިކަމަށް ފުލުހުން ބުނެފައިވެއެވެ.

ފުލުހުންގެ ބަޔާނުގައި ބުނެފައިވާ ގޮތުގައި އެ ދެ އަންހެނުން ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ. އަދި އެގޮތަށް ޢަމަލުތައް ނުބެހެއްޓުމަށް ތަކުރާރުކޮށް ނަސޭހަތްތެރިވުމަށްފަހު ކަމަށްވެސް ފުލުހުން ބުނެފައިވެއެވެ.