ފަސް ރަށެއްގައި އައިސް ޕްލާންޓު ގާއިމްކުރުމަށް ފުރުސަތު ހުޅުވާލައިފި

މަސްވެރިކަމުގެ ދާއިރާ ތަރައްގީކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ރާއްޖޭގެ ފަސް ރަށެއްގައި އައިސް ޕްލާންޓު ގާއިމްކޮށްދޭނެ ފަރާތެއް ހޯދުމަށް ބީލަން ހުޅުވާލައިފިއެވެ.

ސައުދީ ފަންޑް ފޯ ޑިވެލޮޕްމަންޓްގެ އެހީގައި ދިވެހި ސަރުކާރުން ކުރިއަށް ގެންދާ ޑިވެލޮޕްމަންޓް އޮފް ފިޝަރީޒް ސެކްޓަރ ޕްރޮޖެކްޓްގެ ދަށުން މި މަސައްކަތް ކުރިއަށް ގެންދިއުމަށް ނިންމާފައިވާކަމަށް މާލީ ވުޒާރާއިން މައުލޫމާތު ދީފައިވެއެވެ. އައިސް ޕްލާންޓު ގާއިމްކުރުމަށް ހަމަޖެހިފައިވަނީ ގދ. ރަތަފަންދޫ، އއ. ރަސްދޫ، ހއ. އިހަވަންދޫ، ހއ. ދިއްދޫ އަދި ށ. ކޮމަންޑޫގައެވެ.

މި މަސައްކަތަށް ޝައުގުވެރިވާ ފަރާތްތަކަށް އަންނަ މަހުގެ 20 ވަނަ ދުވަހު ނެޝަނަލް ޓެންޑަރގެ ޖަލްސާކުރާ މާލަމުގައި ބީލަން ހުޅުވާލެވޭނެކަމަށް މާލީ ވުޒާރާއިން ބުނެފައިވެއެވެ. މި މަސައްކަތް ކުރިއަށް ގެންދާނީ އިންޓަރނޭޝަނަލް ބިޑިންގ އެންސީބީގެ އުސޫލުންނެވެ.

ބީލަމުގައި ބައިވެރިވާން އެދޭ ފަރާތްތަކުން 1500 ރުފިޔާ ނުވަތަ 100 ޑޮލަރުގެ ރަޖިސްޓްރޭޝަން ފީއެއް ދައްކަންޖެހޭނެއެވެ. އަދި ބިޑު ހުޅުވާ ތާރީޚުން ފެށިގެން 148 ދުވަހުގެ ތެރޭގައި ބިޑް ސެކިއުރިޓީގެ ގޮތުގައި 250،000 ރުފިޔާ ނުވަތަ 16,213 ޑޮލަރު ދައްކަންޖެހޭނެއެވެ.

މަސްވެރިކަމުގެ ސިނާއަތް ތަރައްގީކުރުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، މި ޕްރޮޖެކްޓަކީ އެތައް އަހަރެއް ވަންދެން އިހުމާލުވެފައިވާ އައިސް ޕްލާންޓުތައް މަރާމާތުކުރުމުގެ އިތުރުން، މަސްވެރިންނަށް އިތުރު ފަސޭހަތަކެއް ފޯރުކޮށްދިނުމަށް ކުރެވޭ މަސައްކަތެކެވެ.