އަލްއަޤްޞާ މިސްކިތުގައި ފައްޅިއެއް އަޅަން އިސްރާއީލުން އުޅޭ އުޅުން ސަޢޫދީ ޢަރަބިއްޔާއިން ކުށްވެރިކޮށްފި

ރިޔާޟް (27 އޮގަސްޓް 2024) - އަލްއަގްސާ މިސްކިތުގައި ފައްޅިއެއް އެޅުމަށް ގޮވާލައްވާ، އިސްރާއީލުގެ ވަޒީރަކު ދެއްކެވި ވާހަކަތައް ސައުދީ އަރަބިއްޔާގެ ފޮރިން މިނިސްޓްރީން  ކުށްވެރިކޮށްފިއެވެ.

އިސްރާއީލުގެ ހަރުކަށި ސެކިއުރިޓީ މިނިސްޓަރު އިޓަމަރު ބެން-ގްވިރު، ޖެރޫސަލަމްގެ އަލް-އަޤްޞާ މިސްކިތުގައި ޔަހޫދީންނަށް ނަމާދުކުރުމުގެ ހުއްދަ ދޭންވާނެކަމަށް ތަކުރާރުކޮށް ގޮވާލުމާގުޅިގެން، މި ގޮވާލުމުން ޣައްޒާގައި ހިނގަމުންދާ ހަނގުރާމަ ހުއްޓާލުމަށް ސުލްހައިގެ މަސައްކަތަށް ހަލަބޮލިކަން އިތުރުކޮށްފައިވާކަމަށް ބުނެ، އިސްރާއީލަށް މިދަނޑިވަޅުގައިވަނީ ފާޑުކިޔުންތަކާ ކުރިމަތިވެފައިވެއެވެ.

އެ ތަނުގައި ފައްޅިއެއް އެޅުމުގެ ފުރުސަތު ލިބިއްޖެނަމަ އަޅާނެތޯ ނޫސްވެރިއަކު ސުވާލުކުރުމުން ބެން-ގްވިރު ޖަވާބުދެއްވީ "އާނ، އާނ" އެވެ. ފައްޅިއެއް އަޅާނެކަމަށެވެ.

ސައޫދީ ޢަރަބިއްޔާއިން މިފަދަ ހައްދުފަހަނައަޅާފައިވާ އަދި އަރައިރުންވުން އުފެދޭ ބަޔާންތަކާއި، ދުނިޔޭގެ މުސްލިމުންނަށް ކުރަމުންދާ ޕްރޮވޮކޭޝަންތަކާމެދު ކަނޑައެޅިގެން އިންކާރުކުރާކަން ސައުދީ ޢަރަބިއްޔާއިން ނެރުނު ބަޔާނުގައި، ބަޔާންކޮށްފައިވެއެވެ.

"އަލް-އަޤްޞާ މިސްކިތުގެ ތާރީޚީ އަދި ޤާނޫނީ ހައިސިއްޔަތަށް އިޙްތިރާމްކުރަންޖެހޭކަން" ސައޫދީ ޢަރަބިއްޔާއިން އަލުން އޮޅުންފިލުވައިދީފައިވާކަމަށް އެ ބަޔާނުގައި ބުނެފައިވެއެވެ.

ފަލަސްޠީނުގެ އިންސާނީ ކާރިސާ ނިމުމަކަށް ގެނެސް، ބައިނަލްއަޤްވާމީ ޤާނޫނުތަކާއި، އުސޫލުތަކާއި، ޤަރާރުތަކާ ޚިލާފަށް އިސްރާއީލުން ކުރަމުންދާ ކަންތައްތަކަށް ޒިންމާދާރުކުރުވުމަށް އެކަށީގެންވާ ފިޔަވަޅުތައް އަޅަން ބައިނަލްއަޤްވާމީ މުޖުތަމަޢުއަށް ގޮވާލުން ސައޫދީ ޢަރަބިއްޔާއިން އަލުން ތަކުރާރުކޮށްފައިވެއެވެ.