ބަންގްލަދޭޝްގައި ބޯކޮށް ވާރޭވެހުމާ ގުޅިގެން ފެންބޮޑުވެ 15 މީހުން މަރުވެއްޖެ

ބަންގްލަދޭޝަށް މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ބައެއް ސަރަޙައްދުތަކުގައި ފެންބޮޑުވެ ފަނަރަ މީހުން މަރުވެއްޖެއެވެ.

އެ ޤައުމުގެ ކާރިސާތަކާ ބެހޭ އިދާރާއިން ބުނެފައިވަނީ ފެންބޮޑުވުމާ ގުޅިގެން ބައެއް ރަށްތަކުގައި ޢާންމުންގެ ގެދޮރާއި ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާ ކަމަށާއި، ފެންބޮޑުވެފައިވާ ސަރަޙައްދުތަކުގައި ތިން މިލިޔަނަށް ވުރެ ގިނަ މީހުން ތާށިވެފައިވާ ކަމަށެވެ.

ފެންބޮޑުވެފައިވާ ސަރަޙައްދުތަކުގައި ދިރިއުޅޭ ރައްޔިތުން މިހާރު ދަނީ ރައްކާތެރި ހިސާބުތަކަށް ދަތުރުކުރަން މަސައްކަތް ކުރަމުންނެވެ. ބަންގްލަދޭޝްގެ ފެންބޮޑުވުމާ ގުޅޭ އިންޒާރު ދޭ މަރުކަޒު (އެފްއެފްޑަބްލިޔުސީ)އިން ބުނެފައިވަނީ ކުރިއަށް އޮތް 24 ވަރަކަށް ގަޑިއިރުގެ ތެރޭގައި ވެސް އެ ޤައުމުގެ ބޮޑު ސަރަޙައްދަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށާއި، އިތުރު ސަރަޙައްދުތަކެއްގައި ފެންބޮޑުވާނެ ކަމަށް ބެލެވޭ ކަމުގައެވެ.

ފެންބޮޑުވުމުގެ އަސަރު އެންމެ ބޮޑަށް ކޮށްފައިވާ ސަރަޙައްދުތަކުގެ ތެރޭގައި ފޭނީ، މޯލޯބީބާޖާރު، ހޯބީގޮންޖް، ކުމިއްލާ އަދި ޗޮއްޓޮގްރާމް ހިމެނެއެވެ. މި ސަރަޙައްދުތަކުގައި ކޯރުތަކުގެ ފެންގަނޑު ބަންޑުންވެ، މަގުތަކާއި ހަލިމަގުތަކުގައި ވަނީ ފެންބޮޑުވެފައެވެ. މިކަމާ ގުޅިގެން ހާލުގައި ޖެހިފައިވާ މީހުން ސަލާމަތްކޮށް، އެހީތެރިކަން ފޯރުކޮށްދިނުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. ފެންބޮޑުވުމުގެ އަސަރު ކޮށްފައިވާ ބައެއް ސަރަޙައްދުތަކުގެ ރައްޔިތުން ބުނެފައިވަނީ ފާއިތުވި 20 ވަރަކަށް އަހަރު ދުވަހުގެ ތެރޭގައި މިފަދަ މަންޒަރެއް ފެނިފައި ނުވާ ކަމުގައެވެ.

ވޯލްޑް ބޭންކުން 2015 ވަނަ އަހަރު ޝާއިޢު ކޮށްފައިވާ ރިޕޯޓެއްގައި ހާމަކޮށްފައިވާ ގޮތުގައި، ބަންގްލަދޭޝަށް ވިއްސާރަ މޫސުމުގައި އާދަޔާ ޚިލާފަށް ގިނައިން ވާރޭވެހުމާ ގުޅިގެން ކޯރުތަކުގެ އައްސޭރިފަށުގައި ދިރިއުޅޭ 3.5 މިލިޔަނެއްހާ މީހުންގެ ފުރާނައަށް ނުރައްކާވާނެ ކަމަށް ބެލެވެއެވެ.