ތިލަފުށީގައި އަލިފާނުގެ ހާދިސާއެއް ހިނގާ، އެކަކު ފިހިއްޖެ

ކ. ތިލަފުށީގައި ހުރި މެރިންޑޯ މެރިންވޯކްސްގެ ވޯކްޝޮޕްގައި މިއަދު ހެނދުނު އަލިފާނުގެ ހާދިސާއެއް ހިނގާ، އެ ހާދިސާގައި ދިވެއްސަކު ފިހި ހޮސްޕިޓަލުން ފަރުވާ ދޭންޖެހިއްޖެއެވެ.

އެމްއެންޑީއެފްއިން މައުލޫމާތު ދިން ގޮތުގައި، އަލިފާން ރޯވެފައިވަނީ މެރިންޑޯ މެރިންވޯކްސްގެ ވޯކްޝޮޕްގައެވެ. އަލިފާން ނިއްވުމުގެ މަސައްކަތުގައި ތިލަފުށީ ފަޔާ ސެންޓަރުގެ ފަޔަރ ފައިޓަރުން ހަރަކާތްތެރިވަމުން ދިޔައެވެ.

މި ހާދިސާގެ ފޮޓޯތަކާއި ވީޑިއޯ ސޯޝަލް މީޑިއާގައި ފެތުރިގެން ދިޔައެވެ. އެ ވީޑިއޯތަކުން ފެންނަ ގޮތުގައި، އިމާރާތުން ވަރަށް ބޮޑަށް އަލިފާން ރޯވެ، ކަޅު ދުން އުދުއްސަށް އަރަމުން ދިޔައެވެ. އަދި އަލިފާންގަނޑު ކައިރީގައި ހުރި އެހެން އިމާރާތްތަކަށް ވެސް ފެތުރެމުންދާ މަންޒަރު ފެނުނެވެ.

އެމްއެންޑީއެފްއިން އިތުރަށް މައުލޫމާތު ދިން ގޮތުގައި، މި ހާދިސާގައި އެއް ދިވެއްސަކަށް ދުމުގެ އަސަރުކޮށް، ކޮންމެވެސް ވަރަކަށް ފިހިގެން ހޮސްޕިޓަލަށް ގެންގޮސްފައިވެއެވެ. ނަމަވެސް އޭނާގެ ހާލަތާ ބެހޭ އިތުރު މައުލޫމާތެއް ހާމަކޮށްފައެއް ނުވެއެވެ.

މި ހާދިސާގެ ސަބަބުން ލިބުނު ގެއްލުމުގެ މިންވަރު އަދި ސާފުވެފައެއް ނުވެއެވެ. އަދި އަލިފާން ރޯވި ސަބަބު ބަލައި ތަހުގީގު ކުރަމުންދާ ކަމަށް އެމްއެންޑީއެފްއިން ބުނެފައިވެއެވެ.