މޫނު ބުރުގާ އަޅާ މީހުންނަށް ވަޒީފާ ދިނުމުގައި ތަފާތުކުރުން ނުގެންގުޅުމަށް އަންގަވައިފި

މޫނު ބުރުގާ އަޅާ މީހުންނަށް ވަޒީފާ ނުދޭގޮތަށް ހަދާފައިވާ އުސޫލުތައް ބަދަލުކުރުމަށް ސަރުކާރުގެ އިދާރާތަކަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު މިއަދު އަންގަވައިފި އެވެ.

މިކަން މިގޮތަށް ނިންމެވީ ދ. ހުޅުދެލީ ކޯޓުގެ ވަޒީފާއަކަށް ކުރިމަތިލީ އަންހެނަކު މޫނު ބުރުގާ އަޅާތީ ޑިސްކޮލިފައި ކުރި މައްސަލައެއް ރޭ ފެންމަތިވުމާ ގުޅިގެންނެވެ. މި މައްސަލައާ ގުޅޭ ގޮތުން ރައީސް މުއިއްޒު އާއި އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވަނީ މިއަދު އެކަން ކުށްވެރިކުރައްވައިފަ އެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އިސްލާމްދީނާ ހިލާފުނުވާ ގޮތަށް ހެދުން އަޅާ ނަމަ، އެ މީހަކު އަޅާފައި ހުންނަ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެންނުވާނެ ކަމަށެވެ. އަދި މޫނު ބުރުގާ އަޅާ މީހުންނަށް ތަފާތުކުރަން ކުރީގައި ހަދައި އަދިވެސް އަމަލުކުރަމުންދާ ހުރިހާ ގަވައިދުތަކާއި އުސޫލުތައް ބަދަލު ކުރުމަކީ ކުރަންޖެހޭ ކަމެއް ކަމަށް ވިދާޅުވި އެވެ.

"އެކަން ކުރުމަށް ކަމާބެހޭ ފަރާތްތަކަށް ވާނީ މިހާރު އަންގާފައި. އަޅުގަނޑުމެންގެ މި މުޖުތަމައު އަކީ ހުރިހާ މާނައެއްގައި އަދުލުވެރިކަމާއި އިންސާފުވެރިކަން އިސްކުރާ މުޖުތަމައަކަށް ހަދަން އެންމެން އަޒުމް ކަނޑައަޅަމާތޯ،" ރައީސް ވިދާޅުވި އެވެ.

އިސްލާމިކް މިނިސްޓަރު ޝަހީމް ވެސް އެކްސްގައި ލިޔުއްވާފައިވަނީ މޫނު ބުރުގާ އެޅުމަކީ ވަޒީފާއިން މަހުރޫމްވާން ޖެހޭނެ ކަމެއް ނޫން ކަމަށެވެ. އަދި ތަހުޒީބު މުޖުތަމައެއް ބިނާކުރެވޭނީ އެންމެންނަށް ހައްގުތައްދީގެން ކަމަށް ވިދާޅުވެފައިވެ އެވެ.