މިފްކޯއިން މާދަމާ ކޮންމެ ދޯންޏަކަށް ތިން ޓަނު އައިސް ހިލޭ ދޫކުރަނީ

މިފްކޯއިން މަސްވެރިން ނަށް ވަރަށް ގިނައެހީތައް ފޯރުކޮށްދޭ

މަސްވެރިން މަހަށް ފުރުވުމަށް ހިތްވަރު ދިނުމުގެ ގޮތުން މިފްކޯއިން މާދަމާ ކޮންމެ ދޯންޏަކަށް ތިން ޓަނު އައިސް ހިލޭ ދޫކުރަން ނިންމައިފި އެވެ.

މިފްކޯއިން މިރޭ މީޑިއާތަކަށް ފޮނުވި މެސެޖެއްގައި ބުނެފައިވަނީ މިފްކޯގެ ހުރިހާ ސެންޓަރުތަކުންނާއި ތިނަދޫ އައިސް ޕްލާންޓުން ސްޓޮކް ހުސްވަންދެން މި ޚިދުމަތް ދޭނެ ކަމަށެވެ.

ރާއްޖެއަށް ކުރި ވިއްސާރައާ ގުޅިގެން މަސްވެރިންގެ ކޭޝް ފްލޯއަށް ބުރޫއަރާފައިވާތީ، މަސް އޮޑިތަކަށް ބޭނުންވާ އައިސް އަދި ތެޔޮ ހަމަޖައްސައިދިނުމަށް މަސްވެރިން އެދިފައިވާ ކަމަށް މިފްކޯއިން ބުނެއެވެ. އެހެންކަމުން، ކަމާބެހޭ ފަރާތްތަކާ މަޝްވަރާ ކުރުމަށްފަހު މި ނިންމުން ނިންމީ ކަމަށްވެސް އެ ކުންފުނިން ހާމަކޮށްފައިވެއެވެ.

ހުޅަނގުގެ ވިއްސާރައާ ގުޅިގެން އާންމުކޮށް މަސްވެރިކަން ދަށްވެއެވެ. މިދިޔަ ދުވަސްތަކުގައި މަސްވެރިކަން ވަރަށް ބޮޑަށް ދަށަށް ދިއުމަށްފަހު މިހާރު އަންނަނީ މަޑުމަޑުން ރަނގަޅުވަމުންނެވެ. މިފްކޯއިން މިފަދަ ފިޔަވަޅެއް އަޅާފައިވަނީ މި ދަނޑިވަޅުގައި މަސްވެރިންނަށް އިތުރު އެހީތެރިކަމެއް ފޯރުކޮށްދިނުމުގެ ގޮތުން ކަމަށް ބެލެވެއެވެ.

މިފްކޯ