ހެންރީ، ފްރާންސްގެ 21 އަހަރުން ދަށުގެ ޓީމުގެ ކޯޗުގެ މަގާމުން އިސްތިއުފާދީފި

ހެންރީ ޕެރިހުގައި ބޭއްވުނު އޮލިމްޕިކް ގޭމްސްގެ ފުޓްބޯޅަ މުބާރާތުގައި

ޕެރިހުގައި ބޭއްވުނު އޮލިމްޕިކް ގޭމްސްގެ ފުޓްބޯޅަ މުބާރާތުގައި ފްރާންސްއަށް ރިހި މެޑެލް ހޯދައިދިނުމަށްފަހު، ފްރާންސްގެ 21 އަހަރުން ދަށުގެ ޤައުމީ ޓީމުގެ ކޯޗުކަމުން ކުރީގެ ތަޖުރިބާކާރު ފޯވާޑް، ތިއެރީ ހެންރީ (47) ވަނީ އިސްތިއުފާ ދީފައެވެ.

ހެންރީގެ އިސްތިއުފާ އަމިއްލަ ސަބަބުތަކަކާ ހުރެކަން ފްރާންސްގެ ފުޓްބޯޅަ ފެޑެރޭޝަނުން ވަނީ ކަށަވަރުކޮށްދީފައެވެ. އޮންރީ މި މަޤާމާ ހަވާލުވެފައިވަނީ ދެ އަހަރުގެ މުއްދަތަށް ކަމަށްވާއިރު، އޭނާގެ ކޮންޓްރެކްޓް ހަމަވާން އޮތީ 2023 ވަނަ އަހަރުގެ ނިޔަލަށެވެ. ފްރާންސްގެ ފުޓްބޯޅަ ފެޑެރޭޝަނުގެ މައިގަނޑު އަމާޒަކަށް އޮތީ 2025 ވަނަ އަހަރު ބޭއްވުމަށް ހަމަޖެހިފައިވާ 21 އަހަރުން ދަށުގެ ޔޫރަޕިއަން ޗެމްޕިއަންޝިޕަށް ޤައުމީ ޓީމު ކޮލިފައިކުރުވުމެވެ.

އޮންރީގެ އިސްތިއުފާއާ ގުޅިގެން، އޭނާ ކޮށްދެއްވާފައިވާ އަގުހުރި ޚިދުމަތްތަކަށް ފްރާންސްގެ ފުޓްބޯޅަ ފެޑެރޭޝަނުގެ ރައީސް، ފިލިޕް ޑިއަލޯ ވަނީ ޚާއްޞަ ޝުކުރެއް އަދާކުރައްވާފައެވެ.

އޮލިމްޕިކް ގޭމްސްގައި ފާހަގަކޮށްލެވޭ ކާމިޔާބީއެއް ހޯދުމުގެ އަމާޒުގައި ހެންރީ މި މަޤާމާ ހަވާލުވިއެވެ. އޭނާގެ ހުނަރުވެރި އިރުޝާދުގެ ދަށުން ކުޅުނު ފްރާންސްގެ ޓީމުން ވަނީ ފައިނަލްގައި އިތުރު ވަގުތުގައި 5-3 އިން ސްޕެއިންގެ އަތުން ބަލިވެ، ރިހި މެޑެލް ހާސިލުކޮށްފައެވެ.

ފައިނަލް މެޗަށްފަހު އޮންރީގެ މުސްތަޤުބަލާ ގުޅޭގޮތުން ކުރެވުނު ސުވާލުތަކަށް ދިން ޖަވާބުތަކުން ދޭހަވީ، އޭނާ އިތުރަށް 21 އަހަރުން ދަށުގެ ޓީމުގެ ކޯޗުކަމުގައި ނުހުންނާނެ ކަމެވެ.

ފުރާންސް