ތައިލޭންޑުގެ އާ ބޮޑުވަޒީރު މަޤާމުގެ ހުވާ ކުރައްވައިފި

ތައިލޭންޑުގެ އާ ބޮޑުވަޒީރު ޕައެޓޮންޓާން ޝިނަވާޓް

ތައިލޭންޑުގެ އާ ބޮޑުވަޒީރުގެ ގޮތުގައި، އުމުރުން 37 އަހަރުގެ ޕައެޓޮންޓާން ޝިނަވާޓް، މަޤާމުގެ ހުވާ ކުރައްވައިފިއެވެ.

ހުވާ ކުރެއްވީ ބެންކޮކްގައި ހުންނަ ޕުއަ ތައި ޕާޓީގެ މައި މަރުކަޒުގައެވެ. ޕައެޓޮންޓާން އަކީ ކުރީގެ ބޮޑުވަޒީރު އަދި ބިލިއަނަރ ތަކްސިން ޝިނަވާޓްގެ އެންމެ ހަގު ދަރިކަނބަލުންނެވެ.

ޕައެޓޮންޓާން ބޮޑުވަޒީރުކަމަށް ހޮވުނީ ޤާނޫނު ހަދާ މަޖިލީހުން ވޯޓު ނެގުމަށްފަހު، ރަސްގެފާނުގެ ރުހުން ލިބުމާ ގުޅިގެންނެވެ. މަޤާމުގެ ހުވާ ކުރެއްވުމަށްފަހު އޭނާ ވަނީ ރަސްގެފާނަށާއި، ތައިލޭންޑުގެ ރައްޔިތުންނަށާއި އަދި ޤާނޫނު ހަދާ މަޖިލީހުގެ މެންބަރުންނަށް ޝުކުރު އަދާކުރައްވާފައެވެ. އަދި މަޤާމުގެ މަސްއޫލިއްޔަތު ވިސްނުންތެރިކަމާއެކު އަދާކުރައްވާނެ ކަމަށާއި، ތައިލޭންޑުގެ ރައްޔިތުންނަކީ އަމިއްލަ ހުވަފެން ދެކެވޭ، އުފެއްދުންތެރި އަދި އެމީހުންގެ އަމިއްލަ މުސްތަޤްބަލު ކަނޑައެޅޭނެ ބަޔަކަށް ހަދާނެކަމުގެ ޔަޤީންކަން ދެއްވިއެވެ.

ޕައެޓޮންޓާން ބޮޑުވަޒީރުކަމާ ހަވާލުވެވަޑައިގަތީ ކުރީގެ ބޮޑުވަޒީރު ސެތާ ތަވިސިންގެ މަޤާމު ގެއްލުނު ދަނޑިވަޅެއްގައެވެ. ތަވިސިންގެ މަޤާމު ގެއްލުނީ 2008 ވަނަ އަހަރު ޖަލު ހުކުމެއް ކޮށްފައިވާ ކުރީގެ ޤާނޫނީ ވަކީލަކު އޭނާގެ ކެބިނެޓްގެ މިނިސްޓަރުކަމުގެ މަޤާމަށް އައްޔަންކުރުމާ ގުޅިގެން، ބޮޑުވަޒީރުގެ ކިބައިގައި ހުންނަންޖެހޭ އަޚްލާޤީ އަދި ސުލޫކީ މިންގަނޑު ފަހަނައަޅާ ދިޔަކަމަށް ބުނެ، އެންމެ މަތީ ކޯޓުން ނިންމުމާ ގުޅިގެންނެވެ.

ތައިލެންޑު