ހާރިޖީ ވަޒީރު ރަސްމީ ދަތުރެއްގައި ސައުދީ އަރަބިއްޔާއަށް ފުރާވަޑައިގެންފި

ހާރިޖީ ވަޒީރު މޫސާ ޒަމީރު

ހާރިޖީ ވަޒީރު މޫސާ ޒަމީރު މިއަދު ރަސްމީ ދަތުރެއްގައި ސައުދީ އަރަބިއްޔާއަށް ފުރާވަޑައިގެންފިއެވެ.

މި ދަތުރުގެ މައިގަނޑު މަޤްޞަދަކީ ރައީސް މުހައްމަދު މުއިއްޒު، ސައުދީގެ ވަލީއަހުދު މުހައްމަދު ބިން ސަލްމާންއަށް ފޮނުއްވާފައިވާ ޚާއްޞަ ސިޓީއެއް ރައްދުކުރުމެވެ.

ހާރިޖީ ވުޒާރާއިން މިއަދު ނެރުނު ބަޔާނެއްގައި ބުނެފައިވާ ގޮތުގައި، މި ދަތުރަކީ ސައުދީގެ ހާރިޖީ ވަޒީރު ފައިސަލް ބިން ފަރުހާން އަލް ސައުދުގެ ދަޢުވަތަކަށް ކުރައްވާ ދަތުރެކެވެ. ފަސް ދުވަހަށް ރޭވިފައިވާ މި ދަތުރުގައި، ދެ ޤައުމުގެ ގުޅުމާއި ކުރިއަށް އޮތްތަނުގައި ކުރެވިދާނެ މަސައްކަތްތަކާ ބެހޭގޮތުން މަޝްވަރާކުރުމަށް ވަނީ ހަމަޖެހިފައެވެ.

މި ދަތުރުގައި އެމްއެމްއޭގެ އައު ގަވަރުނަރު އަޙްމަދު މުނައްވަރު ބައިވެރިވެވަޑައިގަންނަވާނެ ކަމަށް ހާރިޖީ ވުޒާރާއިން ބުނެފައިވީ ނަމަވެސް، އޭނާ ސައުދީއަށް ފުރާވަޑައިގަންނަވާނީ މިރޭގެ ވަގުތެއްގައި ކަމަށް ވަނީ އެނގިފައެވެ.

މީގެ އިތުރުން، ހާރިޖީ ވަޒީރުގެ މި ދަތުރުގައި ސައުދީ ސަރުކާރާއި ސައުދީ ފަންޑު ފޯ ޑިވެލޮޕްމަންޓްގެ އިސް ބޭފުޅުންނާ ބައްދަލުކުރެއްވުމާއި، ރިޔާދުގައި ދިރިއުޅޭ ދިވެހިންނާ ބައްދަލުކުރައްވައި އެ މީހުންގެ ހާލު ބެއްލެވުން ހިމެނެއެވެ.

މި ދަތުރުގައި އެމްބެސެޑަރ އެޓް ލާޖު އަޙްމަދު ނަސީރާއި، އެއަރޕޯޓްސް ކޮމްޕެނީގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދާއި، ޖޮއިންޓް ސެކްރެޓަރީ ބަދޫރާ ސައީދު އަދި ޑިރެކްޓަރު ޖެނެރަލް އައިޝަތު ފަރީނާ ވެސް ބައިވެރިވެވަޑައިގަންނަވައެވެ.

މޫސާ ޒަމީރު