ހުޅުމާލޭގައި ބުޓީކް ހޮޓާ ތަރައްޤީކުރުމުގެ ފުރުޞަތު އެޗްޑީސީން ހުޅުވާލައިފި

ހުޅުމާލޭ ދެވަނަ ފިޔަވަހީގެ އިންޓަގްރޭޓެޑް ޓޫރިޒަމް ޒޯން، އާބަން އައިލްގައި ތިން ބުޓީކް ހޮޓެލް ތަރައްޤީކޮށް ހިންގުމަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުޞަތު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހުޅުވާލައިފިއެވެ.

އެޗްޑީސީން މައުލޫމާތު ދެއްވާފައިވާ ގޮތުގައި މި މަޝްރޫއު ދޫކުރުމުގައި އިސްކަންދޭނީ ލޭންޑް ލީސް މޮޑެލްއަށެވެ. ނަމަވެސް، އެހެން މޮޑެލްތަކަށްވެސް ހުށަހެޅުމުގެ ފުރުޞަތު އޮތްކަމަށް އެ ކޯޕަރޭޝަނުން ބުނެފައިވެއެވެ.

މި މަޝްރޫއުތަކަށް އެއް ފަރާތަށްވުރެ ގިނަ ފަރާތުން ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ، އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކާ މަޝްރޫއު ހަވާލުކުރާނެ ކަމަށް އެޗްޑީސީން ބުނެފައިވެއެވެ. އީއޯއައިތައް އިވެލުއޭޓް ކުރުމުގައި ބަލާނެ ކަންތައްތަކުގެ ތެރޭގައި ޕްރޮޕޯސްކޮށްފައިވާ ބިޒްނަސް މޮޑެލްއާއި، ހިންގުމުގެ ތަޖުރިބާއާއި ސީއެސްއާރު ހިމެނޭކަމަށްވެސް އެޗްޑީސީން ފާހަގަކޮށްފައިވެއެވެ.

އާބަން އައިލްގައި ބުޓީކް ހޮޓެލް ތަރައްޤީކޮށް ހިންގަން ޝައުގުވެރިވާ ފަރާތްތަކުން އަންނަ މަހުގެ އެއްވަނަ ދުވަހުގެ 14:00ގެ ކުރިން އީމެއިލް މެދުވެރިކޮށް business@hdc.mv އަށް އީއޯއައި ހުށަހަޅަންވާނެ ކަމަށްވެސް އެޗްޑީސީން ބުނެފައި ވެއެވެ.