ޓެކްސް އަށް މަކަރު ހެދުމުގެ ދައުވާ މައި ކެމިސްޓްގެ ވެރިޔާ އަށް ކޮށްދޭން އެދިއްޖެ

ރާއްޖޭގައި ފުޅާ ދާއިރާއެއްގައި ބޭސް އިމްޕޯޓްކޮށް ވިއްކާ 'މައި ކެމިސްޓް'ގެ ވެރިޔާ ހުސެއިން އިރުފާންގެ މައްޗަށް ދަޢުވާކޮށްދިނުމަށް އެދި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ޕްރޮސެކިއުޓަރ ޖެނެރަލްގެ އޮފީހަށް މައްސަލައެއް ހުށަހަޅައިފިއެވެ.

މީރާއިން ބުނެފައިވާ ގޮތުގައި، 2018 އަދި 2019 ވަނަ އަހަރުގެ ބީޕީޓީ ބަޔާންތަކާއި 2020 ވަނަ އަހަރުގެ އިންކަމް ޓެކްސް ބަޔާނުގައި ދޮގު މަޢުލޫމާތު ހިމަނާފައިވާ ކަމަށް ތުހުމަތުކުރެވޭތީ މި މައްސަލަ ތަޙުޤީޤުކޮށްފައިވެއެވެ. އިރުފާންގެ ހޯލްސޭލް ވިޔަފާރީގެ އާމްދަނީ ޓެކްސް ބަޔާންތަކުގައި ހިމަނާފައި ނުވާކަން ފާހަގަކުރެވިފައިވާ ކަމަށް މީރާއިން ބުންޏެވެ.

މީރާގެ ތަޙުޤީޤަށް އެނގިފައިވާ ގޮތުގައި، އިރުފާންގެ ފަރާތުން އެވަރެޖްކޮށް އަހަރަކު 53 މިލިއަން ރުފިޔާގެ އާމްދަނީ ރިޕޯޓުކޮށްފައި ނުވެއެވެ. އަދި 12 މިލިއަނަށް ވުރެ ގިނަ ރުފިޔާ އިތުރަށް ދައްކަންޖެހޭކަން އޮޑިޓުތަކުން ފާހަގަވެފައިވެއެވެ.

ޓެކްސް ނެގުމާ ބެހޭ އިދާރީ ގާނޫނުގެ 64 ވަނަ މާއްދާގެ ދަށުން ދައްކަން ޖެހޭ އެއްވެސް ޓެކްސް ދެއްކުމަށް، އެނގި ހުރެ ގަސްދުގައި އެއްކިބާވުމުގެ ނިޔަތުގައި އެއްވެސް ކަމެއް ކުރުމަކީ ކުށެކެވެ. އެފަދަ ކުށެއް ކުރުމަށް ޓެކްސް ދޭންޖެހޭ މީހަކަށް އެހީތެރިވެދިނުމުގެ ނިޔަތުގައި ކަމެއް ކުރުމަކީ ވެސް ކުށެކެވެ.