ރައީސް ޔާމީންގެ މައްޗަށް ކުރާ ދެ މައްސަލައެއްގެ ޝަރީއަތް ކޯޓުން ތާވަލްކޮށްފި

ކުރީގެ ރައީސް އަބްދުﷲ ޔާމީން އަބުދުލް ޤައްޔޫމް

ކުރީގެ ރައީސް އަބްދުﷲ ޔާމީންގެ މައްޗަށް ކުރާ ވ. އާރަށް މައްސަލަ އާއި ރ. ފުއްގިރި މައްސަލައިގެ ޝަރީއަތް ކްރިމިނަލް ކޯޓުން ތާވަލްކޮށްފިއެވެ.

ކޯޓުން މައުލޫމާތު ދިންގޮތުގައި ފުއްގިރި މައްސަލައިގެ ޝަރީއަތް އޮންނާނީ އަންނަ އަންގާރަ ދުވަހު އެވެ. އަދި އާރަށް މައްސަލައިގެ ޝަރީއަތް އޮންނާނީ އަންނަ ބުދަ ދުވަހު އެވެ. މި ދެ މައްސަލަ ވެސް ބައްލަވާނީ ގާޒީ އަލީ ނަދީމެވެ.

ފުއްގިރި މައްސަލައިގައި ޔާމީންގެ މައްޗަށް ދައުވާ ކުރަނީ އެމްއެމްޕީއާރުސީ މެދުވެރިކޮށް ރިސޯޓް ކުއްޔަށް ދޫކުރުމުގައި ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑަރ ކުރެއްވި ކަމަށް ބުނެއެވެ. އަދި އާރަށް މައްސަލައިގައި ދައުވާ ކުރަނީ އެ ރަށް ކުއްޔަށް ދިނުމުގެ މުއާމަލާތާ ގުޅިގެންނެވެ.

އާރަށް މައްސަލައިގައި ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ބާތިލްކޮށް، އެ މައްސަލަ އަލުން ބަލަން ހައި ކޯޓުން ކުރިން އަންގާފައިވެ އެވެ. އެކަމާ ގުޅިގެން ދައުލަތުން ވަނީ ސުޕްރީމް ކޯޓުގައި މައްސަލަ އިސްތިއުނާފްކޮށްފައެވެ. ނަމަވެސް އެ މައްސަލަ ބަލައިގަތުމާ މެދު ސުޕްރީމް ކޯޓުން އަދި ވަކި ގޮތެއް ނިންމާފައެއް ނުވެއެވެ.

ރައީސް ޔާމީން