ސަމާލުވޭ، މިއަދުވެސް 50 މޭލަށް ވައިޖެހޭނެ

މިދުވަސްކޮޅު ރާއްޖޭގެ ކަނޑުތައް އާދަޔާ ޚިލާފަށް ގަދަ

މޫސުމާ ބެހޭ ގައުމީ އިދާރާ (މެޓް) އިން މިއަދު ވެސް ރާއްޖޭގެ ބޮޑު ބަޔަކަށް ވައި ގަދަވާނެ ކަމަށް ލަފާކޮށް ރީނދޫ ސަމާލު ނެރެފިއެވެ. މި ސަމާލު ނެރެފައިވަނީ މާލެ ސިޓީ ހިމެނޭހެން ހއ. އަތޮޅުން ފެށިގެން މ. އަތޮޅާ ހަމައަށް މިއަދު ހެނދުނު 7:00 އިން 11:00 އާ ހަމައަށެވެ.

ރީނދޫ ސަމާލު ނެރުނު އަތޮޅުތަކުގެ ތެރޭގައި ހއ. އަތޮޅާއި ހދ. އަތޮޅާއި ށ. އަތޮޅާއި ނ. އަތޮޅާއި ރ. އަތޮޅާއި ބ. އަތޮޅާއި ޅ. އަތޮޅާއި ކ. އަތޮޅާއި އއ. އަތޮޅާއި އދ. އަތޮޅާއި ވ. އަތޮޅާއި ފ. އަތޮޅާއި ދ. އަތޮޅާއި މ. އަތޮޅު ހިމެނެއެވެ.

މެޓުން ނެރުނު ރީނދޫ ސަމާލުގައި ބުނެފައިވާ ގޮތުގައި، މި ސަރަހައްދުތަކުގައި ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު 50 މޭލަށް ވައިގަދަވެ، ކަނޑުތައް ވެސް ގަދަވާނެ ކަމަށް ލަފާ ކުރެވޭ ކަމަށް ބުނެފައިވެއެވެ.

މެޓުން އިއްޔެ ވެސް ވަނީ ވައިގަދަވާނެ ކަމަށް ލަފާކޮށް ރީނދޫ ސަމާލު ނެރެފައެވެ. މެޓް އޮފީހުން މިއަދުވެސް ވަނީ ކަނޑުދަތުރުކުރާ ފަރާތްތަކުން މޫސުމަށް ސަމާލުކަން ދީގެން ދަތުރުފަތުރު ކުރުމަށް އިލްތިމާސްކޮށްފައެވެ.

މެޓް އޮފީހުން ކުރިން ބުނެފައިވާ ގޮތުގައި ރާއްޖެއަށް މިހާރު ޖެހެމުން މިދާ ބާރުވައި މަޑުވަން ފަށާނީ މިހަފުތާގެ އަންގާރަ ދުވަހުން ފެށިގެންނެވެ.

މޫސުން މޫސުން