ލޭނު މަސްވެރިކަމުގެ ސިޔާސަތު ދޫކޮށްލުމަށް އެމްޑީޕީގެ ރައީސް ގޮވާލައްވައިފި

ލޭނު މަސްވެރިކަން ކުރުމަށް ހުއްދަ ދިނުމަށް އަދުގެ ސަރުކާރުން ގެންގުޅޭ ސިޔާސަތު ދޫކޮށްލަން ޖެހޭކަމަށް އެމްޑީޕީގެ ރައީސް އަދި ކުރީގެ ހާރިޖީ ވަޒީރު ޢަބްދުﷲ ޝާހިދު މިއަދު ގޮވާލައްވައިފިއެވެ.

އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ރާއްޖޭގައި ދެމެހެއްޓެނިވި މަސްވެރިކަމެއް އޮތުމަށް ލޭނުއެޅުމުގެ މަސްވެރިކަން ހިފެހެއްޓިފައި އޮއްވައި، އެކަމަށް ހުއްދަދިނުމުގެ ސިޔާސަތެއް ގެންގުޅޭކަމީ ހައިރާންވާންޖެހޭ ކަމެއް ކަމަށެވެ. އަދި މިއީ އެމްޑީޕީ ސަރުކާރުންވެސް ހުއްދަނުދީ ހިފަހައްޓާފައިވާ ކަމެއްކަން ފާހަގަކުރެއްވިއެވެ.

ޝާހިދު އިތުރަށް ވިދާޅުވީ، ލޭނު އެޅުމުގެ ހުއްދަ ދީފިނަމަ، މިކަމުން މިހާތަނަށް ލިބެމުންއައި މަންފާތައް ގެއްލި މިކަމުގެ ސަބަބުން ފަތުރުވެރިކަމުގެ ސިނާއަތަށްވެސް އެކަމުގެ ނުރަނގަޅު އަސަރުތައް ކުރާނޭ ކަމަށެވެ. މީގެއިތުރުން މިއީ ބައިނަލްއަޤްވާމީ ކަމާބެހޭ ފަރާތްތަކުގެވެސް ނުހަނު ކަންބޮޑުވުން ހިމެނޭކަމެއްކަން އެމަނިކުފާނު ފާހަގަކުރެއްވިއެވެ.

މިގޮތުން އަބްދުﷲ ޝާހިދު ވަނީ ލޭނުގެ މަސްވެރިކަން ހުއްދަދިނުމަށް ސަރުކާރުން ގެންގުޅެމުން އަންނަ ވިސްނުން އަނބުރާ ގެންދިއުމަށް ގޮވާލާފައެވެ.

ޝާހިދު މިފަދައިން ގޮވާލައިފައިވާއިރު ރާއްޖޭގައި ބޮޑު ކަންނެލީގެ ލޭނު މަސްވެރިކަން ކުރުމުގެ ހުއްދަ ދިނުމަށް ނިންމާފައިވަނީ ވަޒީރުންގެ މަޖިލީހުންނެވެ. އަދި އެކަމަށް މިހާރު ފިޝަރީޒް މިނިސްޓްރީން ވަނީ ގަވައިދެއް ވެސް އެކުލަވާލާފައެވެ.

މި ގަވާއިދުގެ ދެލިކޮޕީއަށް އާންމުންގެ ހިޔާލާއި ކޮމެންޓު ހޯދުމަށް މަސްވެރިކަމާއި ބެހޭ ވުޒާރާއިން މިހާރު ހުޅުވައިލާފައިވާއިރު، މި ގަވާއިދުގެ ދެލިކޮޕީއަށް ހިޔާލު ހުށަހެޅުމުގެ ސުންގަޑިއަކީ މި މަހުގެ 18 ވަނަ ދުވަހެވެ. މިގަވާއިދާ ބެހޭ ގޮތުން އެއްވެސް ޚިޔާލެއް ނުވަތަ ކޮމެންޓެއް ވާނަމަ، ހިޔާލު ހުށަހެޅުމުގެ ސުންގަޑީގެ ކުރިން fisheriesmanagement@fisheries.gov.mvއަށް އީމެއިލް ކުރެވޭނެއެވެ.