ޔުނައިޓެޑުން ސީޒަނުގެ ފުރަތަމަ މެޗު ކާމިޔާބުކޮށްފި

އޯލްޑް ޓްރެފަޑްގައި ރޭ ކުޅުނު އިނގިރޭސި ޕްރިމިއަރ ލީގުގެ ފުރަތަމަ މެޗު މެންޗެސްޓަރ ޔުނައިޓެޑުން ފުލަމް އާއި ބައްދަލުކޮށް 0-1 ގެ ނަތީޖާއަކުން ކާމިޔާބު ކޮށްފިއެވެ.

މެޗުގެ ފުރަތަމަ ހާފު ނިމުނުއިރު ދެ ޓީމުންކުރެ އެއްވެސް ޓީމަކަށް ގޯލެއް ނުޖެހުނެވެ. ނަމަވެސް ދެ ޓީމަށްވެސް ގޯލު ޖަހާނެ ރަނގަޅު ފުރުސަތުތަކެއް ލިބުނެވެ.

މިގޮތުން ފުރަތަމަ ހާފުގައި އެންމެ ރަނގަޅު ދެ ފުރުސަތު ލިބުނީ ޔުނައިޓެޑްގެ ބްރޫނޯ ފަނާންޑޭޒްއަށެވެ. ނަމަވެސް ފުލަމްގެ ގޯލްކީޕަރު ބާންޑް ލެނޯ އޭނާގެ ހަމަލާތައް ހުއްޓުވިއެވެ.

ދެވަނަ ހާފުގައިވެސް ދެ ޓީމުން ފޯރިގަދަ ކުޅުމެއް ދެއްކިއެވެ. މި ހާފުގައިވެސް ގިނަ ހަމަލާތަކެއް އުފެއްދީ ޔުނައިޓެޑުންނެވެ.

މެޗުގެ ހަމައެކަނި ގޯލު ޖެހުނީ މެޗު ނިމުމާ ކައިރިވެފައި ވަނިކޮށެވެ. 87 ވަނަ މިނެޓުގައި އަލެހާންޑްރޯ ގާނަޗޯ ތަނަވަސްކޮށްދިން ފުރުސަތަކުން ޔުނައިޓެޑަށް ގޯލު ޖަހައިދިނީ މި ސީޒަނަށް އަލަށް ގުޅުނު ޖޯޝުއާ ޒިކްޒީއެވެ.

އިނގިރޭސި ޕްރިމިއަރ ލީގުގެ ކުޅުންތައް ރޭ ފެށުނު އިރު، މިއަދާއި މިރޭ ވެސް ލީގުގެ އިތުރު މެޗުތައް ކުޅޭނެއެވެ.