ތައިލެންޑްގެ އާ ބޮޑުވަޒީރަކަށް ޒުވާން ޕައޭޓޮންގްޓާން ޝިނަވަޓްރާ އިންތިޚާބުކޮށްފި

ތައިލެންޑްގެ އާ ބޮޑުވަޒީރަކަށް އެ ގައުމުގެ ކުރީގެ ބޮޑުވަޒީރު އަދި މަޝްހޫރު ވިޔަފާރިވެރިޔާ ތަކްސިން ޝިނަވަތުރާގެ އެންމެ ހަގު ދަރިކަނބަލުން ޕައޭޓޮންގްޓާން ޝިނަވަޓްރާ ގާނޫނު ހަދާ މަޖިލީހުން މިއަދު އިންތިޚާބުކޮށްފިއެވެ.

37 އަހަރުގެ ޕައޭޓޮންގްޓާން އަކީ ތައިލެންޑްގެ އެންމެ ޒުވާން ބޮޑުވަޒީރެވެ. އަދި އޭނާގެ ބޮޑުދައިތަ ޔަންގްލަކް ޝިނަވަތުރާ އަށް ފަހު، ތައިލެންޑްގެ ދެވަނަ އަންހެން ބޮޑުވަޒީރެވެ. ޕައޭޓޮންގްޓާން އަކީ ޝިނަވަތުރާ އާއިލާއިން ތައިލެންޑްގެ ތިން ވަނަ ލީޑަރެވެ.

ރައްޔިތުންގެ މަޖިލީހުން އޭނާ ބޮޑުވަޒީރަކަށް މިއަދު ހޮވީ 319 ވޯޓުންނެވެ. އޭނާއާ ދެކޮޅަށް 145 މެންބަރަކު ވޯޓު ދެއްވި އިރު ވަކި ގޮތަކަށް ވޯޓު ނުދެއްވާ 27 މެންބަރަކު ތިއްބެވެ.

ޕައޭޓޮންގްޓާންގެ ބައްޕަ ތަކްސިން އަކީ ތައިލެންޑުގެ އެންމެ މަގުބޫލު ސިޔާސީ ޝަޚްޞިއްޔަތަށް ވިޔަސް، 2006 ވަނަ އަހަރު އަސްކަރީ ބަޣާވާތަކުން އޭނާ މަގާމުން ދުރުކުރިއެވެ. ތަކްސިން އަކީ ފަރުދާގެ ފުރަގަހުގައި ހުންނެވި ފީއު ތައި ޕާޓީގެ ހަގީގީ ލީޑަރެވެ. ޕައޭޓޮންގްޓާންއަށް ސިޔާސީ ގޮތުން ތާއީދު ކުރުމުގެ ފަހަތުގައި ވަނީ އޭނާގެ މަގުބޫލުކަމާއި ނުފޫޒެވެ.

ޕައޭޓޮންގްޓާން ސިޔާސީ މައިދާނަށް އާންމުކޮށް ނުކުމެވަޑައިގަތީ 2021 ވަނަ އަހަރުއެވެ. މިދިޔަ އަހަރު ބޭއްވި އިންތިޚާބާ ދިމާކޮށް ފީއު ތައި ޕާޓީން ބޮޑުވަޒީރު ކަމަށް ވާދަކުރައްވަން ނިންމި ތިން ކެންޑިޑޭޓުންގެ ތެރެއިން އެއް ކެންޑިޑޭޓަކަށް އޭނާވިއެވެ.

ޕައޭޓޮންގްޓާންގެ ނަން ބޮޑުވަޒީރުގެ މަގާމަށް ހުށަހެޅީ ކުރިން އެ މަގާމުގައި ހުންނެވި ސެރެއްތާ ތަވިސް މިދިޔަ ބުދަ ދުވަހު މަގާމުން ދުރުކުރުމާ ގުޅިގެންނެވެ. ދުސްތޫރީ ކޯޓުން އޭނާ މަގާމުން ދުރުކުރީ ރިޝްވަތު ދިންކަން ސާބިތުވެފައިވާ މީހަކު ވަޒީރުންގެ މަޖިލީހުގެ މެމްބަރަކު ކަމަށް އައްޔަން ކުރުމާ ގުޅިގެންނެވެ.