ސްޕާރސް އިން ބާރންލީގެ ވިންގަރ އޮޑޮބަރޓް 25 މިލިއަން ޕައުންޑަށް ސޮއިކުރުވައިފި

ޓޮޓެންހެމް ހޮޓްސްޕަރ އިން ބާރންލީގެ ފްރާންސްގެ 21 އަހަރުންދަށުގެ  ޓީމުގޭ ވިންގަރ ވިލްސަން އޮޑޮބަރޓް 25 މިލިއަން ޕައުންޑަށް ސޮއިކުރުވައިފިއެވެ. 19 އަހަރުގެ މި ކުޅުންތެރިޔާ ސްޕާރސް އާއެކު 2029 ވަނަ އަހަރާ ހަމައަށް ކޮންޓްރެކްޓެއްގައި ސޮއިކޮށްފައެވެ

އޮޑޮބަރޓް ބާރންލީ އާ ގުޅުނީ މިދިޔަ އަހަރުގެ ކުރީކޮޅުއެވެ. އޭނާ ވަނީ ބާރންލީ އަށް އެކި މުބާރާތްތަކުގައި ޖުމްލަ 34 މެޗު ކުޅެ، 5 ލަނޑު ޖަހާފައެވެ. މީގެ ތެރޭގައި 2023 ވަނަ އަހަރުގެ އޮކްޓޯބަރު މަހު ޗެލްސީ އާ ދެކޮޅަށް ކުޅުނު މެޗުގައި ޖެހި ލަނޑު  ފާހަގަކޮށްލެވެއެވެ. މި ލަނޑާއެކު އޮޑޮބަރޓް ވަނީ ޕްރިމިއަރ ލީގުގައި ލަނޑު ޖެހި އެންމެ ހަގު ބާރންލީ ކުޅުންތެރިޔާގެ ރެކޯޑު އަތުލާފައެވެ.

އޮޑޮބަރޓްގެ ކެރިއަރު ފެށުނީ ޕެރިސް ސެއިންޓް-ޖަރމޭންގެ އެކަޑަމީ އިންނެވެ. އޭގެ ފަހުން އޭނާ 2022 ވަނަ އަހަރު ފްރާންސްގެ ޓްރޮއޭސް އާ ގުޅުނެވެ. ޓްރޮއޭސް އަށް އޭނާ ވަނީ 32 މެޗު ކުޅެ، 4 ލަނޑު ޖަހާފައެވެ.