ސްރީ ލަންކާގެ ރިޔާސީ އިންތިޚާބަށް ރެކޯޑު އަދަދަކަށް ކެންޑިޑޭޓުން ކުރިމަތިލައްވައިފި

ކުރިއަށް އޮތް ސްރީ ލަންކާގެ ރިޔާސީ އިންތިޚާބަށް ރެކޯޑު އަދަދަކަށް ކެންޑިޑޭޓުން ކުރިމަތިލުމަށް ފޯމު ހުށަހަޅައިފި ކަމަށް އެޤައުމުގެ އިލެކްޝަންސް ކޮމިޝަނުން ހާމަކޮށްފިއެވެ.

ސްރީލަންކާގެ އިންތިހާބުތަކާއި ބެހޭ މައި ޢިދާރާއިން ހާމަކޮށްފައިވާ ގޮތުގައި އަންނަ މަހު އެ ޤައުމުގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރެއްވުމަށް 39 ކެންޑިޑޭޓެއްގެ ފޯމު މިއަދު ވަނީ އެ އިދާރާއަށް ހުށަހަޅާފައެވެ.

މި އިންތިޚާބަކީ 2022 ވަނަ އަހަރު ލަންކާ ބަނގުރޫޓުވުމަށްފަހު އެ ގައުމުގައި ބާއްވާ ފުރަތަމަ ރިޔާސީ އިންތިޚާބެވެ. މި އިންތިޚާބުގައި އެންމެ ބޮޑު ގޮންޖެހުމަކަށް ވާނީ 2022 ވަނަ އަހަރު އެ ގައުމު ވެއްޓުނު މާލީ ގޮންޖެހުންތަކުން އަރައިގަތުމެވެ.

މި އިންތިޚާބުގައި ގާތްގަނޑަކަށް 17 މިލިއަން މީހުންނަށް ވޯޓުލުމުގެ ހައްގު ލިބިފައިވެއެވެ. އިންތިޚާބުގައި ވާދަކުރައްވާ ބޭފުޅުންގެ ތެރޭގައި މިހާރުގެ ރައީސް ރަނިލް ވިކްރަމަސިންހަ އާއި އިދިކޮޅު ލީޑަރު ސަޖިތު ޕްރޭމަދާސާ އަދި މާކްސިސްޓް ފިކުރުގެ މަޖިލިސް މެމްބަރު އަނޫރާ ކުމާރާ ޑިސަނަޔަކަ ހިމެނެއެވެ.

މީގެ ދެ އަހަރު ކުރިން، ޖުލައި 2022ގައި ރައްޔިތުންގެ މަޖިލީހުން ނިންމުމަށް ފަހު އަދި ކުރީގެ ރައީސް ގޮތަބަޔާ ރާޖަޕަކްސާ އިސްތިއުފާ ދެއްވުމަށް ފަހު، 75 އަހަރުގެ ރަނިލް ވިކްރަމަސިންހަ ވަނީ ފާއިތުވި އަހަރުތަކުގައި އެ ގައުމަށް ކުރިމަތިވި އެންމެ ނުރައްކާތެރި މާލީ ކާރިސާތަކުން ގައުމު ސަލާމަތުގެ އައްސޭރިއަށް ގެންދަވައިފައެވެ.

މި ފަހަރުގެ އިންތިހާބަށް ފަހު ވަގުތު ނުކުންނަވަނީ 225 މެންބަރުންގެ މަޖިލީހުގެ އަގުލަބިއްޔަތު އޮންނަ ސްރީލަންކާ ޕޮޑުޖަނާ ޕެރަމުނާ (އެސްއެލްޕީޕީ) ޕާޓީގެ ކެންޑިޑޭޓެއްގެ ގޮތުގައި ދެ ފަހަރު ރައީސްކަން ކުރެއްވި މަހިންދަ ރާޖަޕަކްސަގެ ދޮށީ ދަރިކަލުން އުމުރުން 38 އަހަރުގެ ނަމާލް ރާޖަޕަކްސާ އެވެ.