އިންޑިއާއިން އަންހެނުންގެ ޓީ20 ވޯލްޑް ކަޕް ބޭއްވުމަށް އިންކާރުކޮށްފި

ބަންގްލަދޭޝްގައި ބޭއްވުމަށް ހަމަޖެހިފައިވާ އަންހެނުންގެ ޓީ20 ވޯލްޑް ކަޕް އެހެން ޤައުމަކަށް ބަދަލުކުރަން ޖެހިއްޖެ ނަމަ، އިންޑިއާއިން އެ މުބާރާތް ބޭއްވުމަށް އިންކާރުކޮށްފިއެވެ. މިކަން ހާމަކޮށްފައިވަނީ އިންޑިއާ ކްރިކެޓް ބޯޑު (ބީސީސީއައި) ގެ ސެކްރެޓަރީ ޖޭ ޝާހެވެ.

ބަންގްލަދޭޝްގައި ފާއިތުވި ހަފްތާތަކުގައި ހިނގި އަނިޔާވެރި މުޒާހަރާތަކާ ގުޅިގެން، ކުރީގެ ބޮޑުވަޒީރު ޝެއިޚް ހަސީނާ އިސްތިއުފާދީ އިންޑިއާއަށް ފިލާފައިވާތީ، އިންޓަނޭޝަނަލް ކްރިކެޓް ކައުންސިލް (އައިސީސީ) އިން ވަނީ ބަންގްލަދޭޝްގެ ހާލަތު ގާތުން ބަލަމުންދާ ކަމަށް ބުނެފައެވެ. އަންހެނުންގެ ޓީ20 ވޯލްޑް ކަޕް ބޭއްވުމަށް ހަމަޖެހިފައިވަނީ އޮކްޓޯބަރު 3 އިން 20 އަށް ބަންގްލަދޭޝްގައެވެ.

ޖޭ ޝާހް ބުނި ގޮތުގައި އައިސީސީ އިން ވަނީ އިންޑިއާގައި މުބާރާތް ބޭއްވުމުގެ އިމްކާނިއްޔަތާ މެދު ސުވާލުކޮށްފައެވެ. ނަމަވެސް އޭނާ ވަނީ އެކަމަށް "ސީދާ އިންކާރުކޮށްފައި" ކަމަށް ބުނެފައެވެ. "އަޅުގަނޑުމެން އަދިވެސް ތިބޭނީ މޫސުމީ ވިއްސާރައިގެ ތެރޭގައި. އަދި ދެން އަންނަ އަހަރު އަޅުގަނޑުމެން އަންހެނުންގެ އޯޑީއައި ވޯލްޑް ކަޕް ބާއްވަން ޖެހޭ،" ޝާހް ޓައިމްސް އޮފް އިންޑިއާއަށް ބުނެފައިވެއެވެ.

ބަންގްލަދޭޝްގައި ދަރިވަރުން އިސްނަގައިގެން ފެށި މުޒާހަރާތަކުގައި 400 އަށްވުރެ ގިނަ މީހުން މަރުވެފައިވެއެވެ. މި މުޒާހަރާތައް ފެށުނީ ސަރުކާރުގެ ވަޒީފާތަކުގައި ކޯޓާ ކަނޑައެޅުމާ ދެކޮޅަށެވެ.

އަންހެނުންގެ ޓީ20 ވޯލްޑް ކަޕްގައި 10 ޓީމު ބައިވެރިވާނެ ކަމަށް ބެލެވެއެވެ. އޭގެ ތެރޭގައި އިނގިރޭސިވިލާތާއި ސްކޮޓްލޭންޑް ހިމެނެއެވެ. މުބާރާތް އެހެން ތަނަކަށް ބަދަލުކުރަން ޖެހިއްޖެ ނަމަ، ސްރީލަންކާ އާއި ޔުނައިޓެޑް އަރަބް އެމިރޭޓްސްއަކީ އެކަށީގެންވާ ދެގައުމު ކަމަށް ބެލެވެއެވެ.