ޔުނައިޓެޑާއެކު ފެނާންޑޭސް ހަދާފައިވާ އެއްބަސްވުން އިތުރުކޮށްފި

މެންޗެސްޓަރ ޔުނައިޓެޑްގެ ކެޕްޓަން ބްރޫނޯ ފެނާންޑޭސް، އެ ކުލަބާއެކު ވެފައިވާ އެއްބަސްވުން 2027 ވަނަ އަހަރުގެ ޖޫން މަހުގެ ނިޔަލަށް އައުކޮށްފިއެވެ. މި އެއްބަސްވުމުގެ ދަށުން، އިތުރު އަހަރެއްގެ މުއްދަތަށް އެއްބަސްވުން އިތުރުކުރުމުގެ ފުރުސަތު ލިބިގެންދާ ކަމަށްވެސް ކުލަބުން ހާމަކޮށްފައިވެއެވެ.

29 އަހަރުގެ ފެނާންޑޭސް، ގާތްގަނޑަކަށް ހަތަރު އަހަރު ކުރިން ޕޯޗުގަލްގެ ސްޕޯޓިންގ ލިޒްބަންއިން ޔުނައިޓެޑަށް ބަދަލުވިއެވެ. މިހާތަނަށް އޭނާ ވަނީ ޔުނައިޓެޑަށް ކުޅެދިން 234 މެޗުގައި 79 ލަނޑު ޖަހައި، އިތުރު 67 ގޯލު ޖެހުމަށް އެހީތެރިވެދީފައެވެ.

ޔުނައިޓެޑްގެ އައު އެއްބަސްވުމުގައި ސޮއިކުރުމަށްފަހު ނެރުނު ބަޔާނެއްގައި ފެނާންޑޭސް ބުނެފައިވަނީ، ޔުނައިޓެޑާމެދު އޭނާގެ ހިތުގައި އޮތް ލޯބި އެންމެންނަށް އެނގޭނެ ކަމަށެވެ. އަދި އިތުރަށް ބުނެފައިވަނީ، "މި ޖާޒީ ލުމުގެ ޒިންމާއާއި މުހިންމުކަން އަހަރެންނަށް އެނގޭ. އަދި މި ފާހަގަކޮށްލެވޭ މޮޅު ކުލަބު ތަމްސީލުކުރުމަށް ބޭނުންވާ ހިތްވަރާއި ފޯރިވެސް އެނގޭ" ކަމަށެވެ.

ފެނާންޑޭސް އިތުރަށް ހާމަކުރި ގޮތުގައި، ޔުނައިޓެޑްގެ ޖާޒީގައި އޭނާގެ އެންމެ މޮޅު ކުޅުމާއެކު އުފާވެރި ދުވަސްތަކެއް ކުރިއަށް އޮތްކަމަށް ޤަބޫލުނުކުރާނަމަ، މި އައު އެއްބަސްވުމުގައި ސޮއިނުކުރާނެ ކަމަށެވެ.

އެންމެ ފަހުން ބޭއްވުނު އެމިރޭޓްސް އެފްއޭ ކަޕްގެ ޗެމްޕިއަން މެންޗެސްޓަރ ޔުނައިޓެޑް، އައު ސީޒަނުގެ ޕްރިމިއަރ ލީގުގެ ފުރަތަމަ މެޗުގައި ހުކުރު ދުވަހުގެ ރޭ އަމިއްލަ ދަނޑުގައި ނިކުންނާނީ ފުލަމްއާ ދެކޮޅަށެވެ.