ދިވެހިރާއްޖެއާއި ޖަޕާނާ ދެމެދު, އިންސާނީ ވަސީލަތް ތަރައްޤީކުރުމުގެ އެއްބަސްވުމެއްގައި ސޮއިކޮށްފި

މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މަރްޔާ އާއި ދިވެހިރާއްޖެއަށް ކަނޑައަޅުއްވާފައި ހުންނަވާ ޖަޕާނުގެ ސަފީރު ތަކެއުޗި މިދޯރީ ވަނީ އިންސާނީ ވަސީލަތް ތަރައްޤީކުރުމުގެ މަޝްރޫޢުގެ އެއްބަސްވުމުގައި ސޮއިކުރައްވާފައެވެ. މި އެއްބަސްވުމުގައި ސޮއިކުރެއްވީ ޚާއްޞަ ރަސްމިއްޔާތެއްގައެވެ.

ޖަޕާނުގެ ހިލޭ އެހީގެ ދަށުން ހިންގާ އިންސާނީ ވަސީލަތް ތަރައްޤީކުރުމުގެ މަޝްރޫޢުގެ ސްކޮލަރޝިޕް (ޖޭޑީއެސް) ގެ ދަށުން، ދިވެހިރާއްޖޭގެ 24 ސިވިލް ސަރވަންޓުންނަށް ޖަޕާނުގެ ޔުނިވަރސިޓީތަކުގައި މާސްޓަރސް ފުރިހަމަކުރުމުގެ ފުރުޞަތު ލިބިގެންދާނެއެވެ. މި މާސްޓަރސް ޕްރޮގްރާމްތައް ފުރިހަމަކުރަންޖެހޭނީ އެއް އަހަރާއި ދެ އަހަރާ ދެމެދުގެ މުއްދަތެއްގައެވެ. މި ޕްރޮގްރާމްތަކުގެ ޚަރަދުތައް ހަމަޖައްސައިދޭނީ ޖަޕާނު ސަރުކާރުންނެވެ. މި އެއްބަސްވުމުގެ ދަށުން، ވޭތުވެދިޔަ ހަތަރު އަހަރުގެ ތެރޭގައި 24 ސްކޮލަރޝިޕް ލިބެން ހުރިއިރު، 22 ދަރިވަރުން ވަނީ މަތީ ތަޢުލީމު ހާސިލުކޮށްފައެވެ.

މި ރަސްމިއްޔާތުގައި މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ އިސް އޮފިޝަލުންނާއި މުވައްޒަފުންގެ އިތުރުން، ސިވިލް ސަރވިސް ކޮމިޝަނުގެ ރައީސާ ފާތިމަތު ޝަރީފް، މިނިސްޓަރ އޮފް ފޮރިން އެފެއާޒް މޫސާ ޒަމީރު، އަދި ދިވެހިރާއްޖޭގައި ހުންނަ ޖަޕާނުގެ އެމްބަސީގެ އިސް ބޭފުޅުން ބައިވެރިވެވަޑައިގެންނެވިއެވެ.

ޖަޕާން ޖޭޑީއެސް