އިންޑިއާގެ މިނިވަން ދުވަހާ ގުޅިގެން ރައީސް މުޢިއްޒު ތަޙްނިޔާ ފޮނުއްވައިފި

ރައީސް ޑރ.މުހައްމަދު މުއިއްޒު އިންޑިއާގެ ބޮޑުވަޒީރާއި ބައްދަލުކުރައްވަނީ / ފޮޓޯ:ރައީސް އޮފީސް

އިންޑިއާގެ 78 ވަނަ މިނިވަން ދުވަހާއި ގުޅިގެން ރާއްޖޭގެ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު އިންޑިއާގެ ރައީސް ދްރައުޕަދީ މުރުމު އަދި ބޮޑުވަޒީރު ނަރެންދްރަ މޯދީއަށް ތަޙްނިޔާ ދަންނަވައިފިއެވެ.

ރައީސް މުޢިއްޒު އިންޑިއާގެ މިނިވަން ދުވަހުގެ ތަޙްނިޔާ ވިދާޅުވެފައިވަނީ މިއަދު އެކްސް ގައި ކުރެއްވި ޕޯސްޓެއްގައެވެ. މި ޕޯސްޓުގައި ރައީސް ވަނީ އިންޑިއާގެ ހުރިހާ ރައްޔިތުންނަށް މިނިވަން ދުވަހުގެ ހެޔޮ އެދުންތައް އަރިސްކުރައްވާފައެވެ.

ރައީސް މުޢިއްޒު ވިދާޅުވެފައިވަނީ ރާއްޖެއާއި އިންޑިއާއާ ދެމެދު އޮތް ގުޅުމަކީ ތާރީޚުގައި އަސްލު އޮތް ގުޅުމެއް ކަމަށާއި، މި ގުޅުން ވަނީ ރާއްޖެއާއި މުޅި ސަރަޙައްދުގެ ތަރައްޤީއާއި ކުރިއެރުމަށް މަގުފަހިކޮށްދޭ ގުޅުމަކަށް ވެފައި ކަމަށެވެ. އަދި ކުރިއަށް އޮތްތަނުގައި ދެ ޤައުމުގެ ދެމެދުގައި އޮތް މި ބަދަހި ގުޅުން އިތުރަށް ވަރުގަދަވެ، ދެ ޤައުމަށް ވެސް ފައިދާ ކުރާނެ ކަމަށް ރައީސް ވިދާޅުވިއެވެ.

މީގެއިތުރުން، ދެ ޤައުމުން ޙާޞިލުކުރަން ބޭނުންވާ ލަނޑުދަނޑިތައް ޙާޞިލުކުރުމަށް މަގުފަހިވެގެންދާނެ ކަމުގެ ޔަޤީންކަން އޮތް ކަމަށް ވެސް ރައީސް ވިދާޅުވެފައިވެއެވެ.

މިދިޔަ ހުކުރު ދުވަހު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިޔަމް ޖައިޝަންކަރު ވަނީ ރާއްޖެއަށް ތިން ދުވަހުގެ ރަސްމީ ދަތުރެއް ވެސް ކުރައްވާފަ އެވެ. އެ ދަތުރުގައި ދެ ގައުމުގެ އެކުވެރިކަމުގެ ގުޅުން އިތުރަށް ބަދަހިކުރަން ކުރަންހުރި ކަންތައްތަކާއި ގުޅޭގޮތުން ވަނީ މަޝްވަރާކުރައްވާފައެވެ.

ރާއްޖެ އިންޑިޔާ އިންޑިޔާ ރައީސް ޑރ މުޙައްމަދު މުޢިއްޒު