ވިއްސާރައިގަ ލިބުނު ގެއްލުންތަކުގެ އެސެސްމަންޓް ހެދުމުގެ މަސައްކަތް މާދަމާ ފަށަނީ

މި ހަފްތާގައި ރާއްޖެއަށް ކުރި ވިއްސާރައިގައި ލިބުނު ގެއްލުންތަކުގެ ތަފްޞީލް ދެނެގަތުމަށް ކުރެވޭ އެސެސްމަންޓުގެ މަސައްކަތް މާދަމާ ފެށޭނެކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން މަޢުލޫމާތު ދެއްވައިފިއެވެ.

ރާއްޖޭގެ ގިނަ ސަރަޙައްދުތަކަށް މޫސުން ގޯސްވެ، ބޯކޮށް ވާރޭވެހި، ފެންބޮޑުވުމާއި ވައިގަދަވުމުގެ ސަބަބުން ގޭބިސީތަކަށް ފެންވަދެ، އެކި މިންވަރުގެ ގެއްލުންތައް ވަނީ ލިބިފައެވެ. މިފަދަ ހާދިސާތައް މާލެއާއި އަތޮޅުތަކުގެ އެކި ރަށްރަށުންވެސް ވަނީ ރިޕޯޓުކޮށްފައެވެ. މި ގެއްލުންތައް ލިބިފައިވާ ގޭބިސީތައް ދެނެގަތުމަށް ތަފްޞީލީ އެސެސްމަންޓެއް ހެދުމުގެ މަސައްކަތް މާދަމާ ފެށުމަށް ތައްޔާރުވަމުންދާކަމަށް އެންޑީއެމްއޭއިން ހާމަކުރައްވާފައިވެއެވެ.

މި ހަފްތާގެ ކުރީކޮޅުން ފެށިގެން ރާއްޖެއަށް ކުރަމުންދިޔަ ވިއްސާރައިގައި އެންމެ ބޮޑެތި ގެއްލުންތައް ލިބިފައިވަނީ ވޭތުވެދިޔަ ދެ ދުވަހު ބޯކޮށް ވާރޭވެހި، ވައިގަދަވުމުގެ ސަބަބުންނެވެ. އެކި ރަށްރަށަށް ލިބުނު ގެއްލުންތައް އެންޑީއެމްއޭއިން ދަނީ ބަލަމުންނާއި ވަގުތީ އެހީތެރިކަން ފޯރުކޮށްދެމުންނެވެ. މީގެ ތެރޭގައި ފެންވަދެ، ނަޖިސް ލީކުވުމުގެ ސަބަބުންނާއި ވައިގަދަވެ ހިނގި އެކި ހާދިސާތަކާ ގުޅިގެން ބައެއް ގޭބިސީތަކުން ރައްކާތެރި ތަންތަނަށް ޢާއިލާތައް ބަދަލުކުރިކަން އެންޑީއެމްއޭއާއި ކައުންސިލްތަކުން ވަނީ ފާހަގަކުރައްވާފައެވެ.

ވަގުތީ އެހީތެރިކަން ފޯރުކޮށްދިނުމަށްފަހު، ކަނޑައެޅިފައިވާ އުސޫލުތަކާ އެއްގޮތަށް ލިބުނު ގެއްލުންތަކުގެ ތަފްޞީލު ހޯދުމަށް އެންޑީއެމްއޭއިން އެސެސްމަންޓްތައް ހަދައި، ގެއްލުމުގެ ބަދަލު ދިނުމުގެ މަސައްކަތް ކުރިއަށް ގެންދާނެއެވެ. ވިއްސާރައާ ގުޅިގެން 250 އަށްވުރެ ގިނަ މީހުން އެހީތެރިކަމަށް އެދިފައިވާކަމަށް އެންޑީއެމްއޭއިން ކުރިން ވަނީ މަޢުލޫމާތު ދެއްވާފައެވެ.