ރަޝިޔާގެ ކާސްކް ސަރަހައްދުގައި ތިބި ދިވެހިން ސަމާލުވުމަށް އިލްތިމާސްކޮށްފި

ރަޝިޔާ އާއި ޔޫކްރެއިންއާ ދެމެދު ހިނގަމުންދާ ހަނގުރާމައާ ގުޅިގެން ރަޝިޔާގެ ކާސްކް ސަރަހައްދުގައި ދިރިއުޅޭ އަދި އެ ސަރަހައްދަށް ދަތުރު ކުރާ ދިވެހިން ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.

ފޮރިން މިނިސްޓްރީން މިރޭ ނެރުނު ބަޔާނެއްގައި ބުނެފައިވަނީ ކާސްކްގައި ތިބި ދިވެހި ދަރިވަރުންގެ ހާލު ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީން ވަރަށް ގާތުން ބަލަމުންދާ ކަމަށެވެ.

"މި ދަނޑިވަޅުގައި، އެ ސަރަހައްދުގައި ދިރިއުޅުއްވާ އަދި ދަތުރުފަތުރު ކުރައްވާ އެންމެހައި ދިވެހި ރައްޔިތުން އަމިއްލަ ރައްކާތެރިކަމާއި ސަލާމަތްތެރިކަމަށް ޚާއްޞަ އަހައްމިއްޔަތުކަމެއް ދެއްވުމަށް އިލްތިމާސް ކުރަމެވެ،" އެ ބަޔާނުގައި ބުނެފައިވެއެވެ.

ރަޝިޔާއަކީ މެޑިސިން ދާއިރާއިން ކިޔަވާ ގިނަ އަދަދެއްގެ ދިވެހި ދަރިވަރުން ތަޢުލީމު ހާސިލު ކުރަމުންދާ ޤައުމެކެވެ.

ޔޫކްރެއިނާއި ރަޝިޔާއާ ދެމެދު ހިނގާ ހަނގުރާމައާ ގުޅިގެން އެ ޤައުމުގައި ދިރިއުޅޭ ދިވެހިން ސަމާލުވުމަށް މީގެ ކުރިން ވެސް ފޮރިން މިނިސްޓްރީން އެދިފައިވެއެވެ. އެ ޤައުމުގައި ހިނގަމުންދާ ހަނގުރާމައިގައި އެއްވެސް ދިވެއްސަކަށް މިހާތަނަށް އަނިޔާއެއް ލިބިފައެއް ނުވެއެވެ.

ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ ކާސްކްގައި އޮތް ނުރައްކާތެރި ހާލަތާ ގުޅިގެން އެއްވެސް އެހީތެރިކަމެއް ބޭނުންވާނަމަ، ޖަރުމަނުވިލާތުގައި ހުންނަ ދިވެހި އެމްބަސީގެ ނަންބަރު، +491712916461 އަށް ގުޅައި ނުވަތަ info@maldivesembassy.de އަށް އީމެއިލް ކުރުމަށް އެދޭ ކަމަށެވެ.

ޔޫކްރެއިނާއި ރަޝިޔާއާ ދެމެދު  ހަނގުރާމަ ފެށުނީ 2022 ވަނަ އަހަރުގެ ފެބްރުއަރީ މަހުގައެވެ. މި ހަނގުރާމައިގެ ސަބަބުން ދެ ޤައުމަށް ވެސް ބޮޑެތި ގެއްލުންތަކާއި އިޤްތިޞާދީ ދަތިތައް ކުރިމަތިވެފައިވާއިރު، ބައިނަލްއަޤްވާމީ މުޖުތަމަޢުން ވަނީ ރަޝިޔާގެ މައްޗަށް ދަތި ކުރުމުގެ ފިޔަވަޅުތަކެއް އަޅާފައެވެ.

މި ހަނގުރާމަ އާއި ގުޅިގެން ޔުކުރޭނުގައި ކިޔަވަން ތިބި ދިވެހި އެތައް ކުދިންނެތް ވެސް ވަނީ ކިޔެވުން ދޫކޮށްލުމަށްފަހު ރާއްޖެއަށް އައިސްފައެވެ. އޭގެ ތެރޭގައި ކިޔެވުން ފުރިހަމަ ކުރުމަށް މަދު ދުވަސްކޮޅަކަށް ވެފައިވާ ބައެއް ދަރިވަރުންވެސް ހިމެނެއެވެ.