ރިއަލް މެޑްރިޑްގެ ކަމަވިންގާއަށް ކަކުލަށް އަނިޔާވެ، ސޫޕަރ ކަޕުން ބޭރުވެއްޖެ

ރިއަލް މެޑްރިޑްގެ ފްރާންސް ޤައުމީ ޓީމުގެ މިޑްފީލްޑަރު އެޑުއާޑޯ ކަމަވިންގާއަށް ކަކުލަށް އަނިޔާވުމާ ގުޅިގެން، ބުދަ ދުވަހު ބޭއްވުމަށް ހަމަޖެހިފައިވާ ޔޫއެފާ ސޫޕަރ ކަޕް މެޗުގައާއި މޫސުމުގެ ފުރަތަމަ ބައިގައި ބައިވެރިއެއް ނުވެވޭނެ ކަމަށް ރިއަލް މެޑްރިޑުން ރަސްމީކޮށް އިއުލާނުކޮށްފިއެވެ.

21 އަހަރުގެ މި ޒުވާން މިޑްފީލްޑަރަށް އަނިޔާވީ އަންގާރަ ދުވަހު ޕޮލެންޑްގެ ވޯސޯ ނެޝަނަލް ސްޓޭޑިއަމްގައި ބޭއްވުނު ތަމްރީނެއްގައި ކަމަވިންގާގެ ބޫޓުގެ ސްޓަޑް ބިމުގައި އެޅި، ޓީމްމޭޓް އޯރެލިއަން ޗައުމެނީއާ ޖެހުމުގެ ސަބަބުންނެއެވެ.

ރިއަލް މެޑްރިޑުން ބުދަ ދުވަހު ނެރުނު ބަޔާނެއްގައި ބުނެފައިވަނީ، މެޑިކަލް ސްކޭންގެ ނަތީޖާއިން ދައްކާ ގޮތުގައި ކަމަވިންގާގެ ވާތް ކަކުލުގެ ކޮލެޓަރަލް ލިގަމަންޓަށް ގެއްލުން ލިބިފައިވާކަމަށެވެ. ރިއަލުން ކަމަވިންގާ އަނބުރާ ކުޅުމަށް ނުކުންނާނެ ވަކި މުއްދަތެއް ހާމަކޮށްފައި ނުވިނަމަވެސް، އޭނާއަށް 7 ހަފްތާއާ ހަމައަށް މުބާރާތްތަކުން ދުރުގައި ހުންނަން ޖެހިދާނެ ކަމަށް ބައެއް މީޑިއާ ރިޕޯޓުތަކުގައި ފާހަގަކޮށްފައިވެއެވެ.

ރިއަލް މެޑްރިޑުން ޕޮލެންޑްގައި ސޫޕަރ ކަޕް މެޗުގައި ވާދަކުރާނީ 2024 ވަނަ އަހަރުގެ ޔޫރަޕާ ލީގް ވިންކުރި އަޓަލާންޓާއާ ދެކޮޅަށެވެ. މި މެޗުގައި ޕީއެސްޖީން އަލަށް ރިއަލް މެޑްރިޑަށް ބަދަލުވި ކައިލިއަން އެމްބާޕޭ ފުރަތަމަ ފަހަރަށް ރަސްމީ މެޗެއްގައި ކުޅޭނެ ކަމަށް ބެލެވެއެވެ.

ރިއަލް މެޑްރިޑުން ލަ ލީގާ ޑިފެންޑްކުރުމަށް ފުރަތަމަ މެޗު ކުޅޭނީ އޯގަސްޓް 18 ގައި ބަރުނަބިއުގައި މަޖޯކާއާ ދެކޮޅަށެވެ.