އައިޖީއެމްއެޗުގެ ކުލިކްތައް މިއަދު ބަންދުވާނެ
ސަރުކާރު ބަންދުވުމާ ގުޅިގެން މިއަދު އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ކްލިނިކަލް ޚިދުމަތްތައް ބަންދުވާނެ ކަމަށް އެ ހޮސްޕިޓަލުން ރޭ އިއުލާނުކޮށްފިއެވެ.
އައިޖީއެމްއެޗުން ނެރުނު މި އިއުލާނުގައި ބުނެފައިވަނީ، މިއަދަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާގެ އޮފީހުން ކަނޑައެޅުމާ ގުޅިގެން، ދަރުމަވަންތަ ހޮސްޕިޓަލާއި އައިޖީއެމްއެޗް އަދި ވިލިމާލެ ހޮސްޕިޓަލުގެ ސްޕެޝަލިސްޓް އޯޕީޑީ އާއި އެހެނިހެން ކްލިނިކަލް ޚިދުމަތްތައް ބަންދުވާނެ ކަމަށެވެ.
ނަމަވެސް އިމަޖެންސީގެ ޚިދުމަތް 24 ގަޑިއިރު ލިބެން ހުންނާނެ ކަމަށް އައިޖީއެމްއެޗުން ބުނެފައިވެއެވެ. އަދި މިކަމާ ބެހޭ އިތުރު މައުލޫމާތު ހޯއްދެވުމަށް އެ ހޮސްޕިޓަލުގެ ނަންބަރު 3335335 އަށް ގުޅުއްވުމަށް އެދިފައިވެއެވެ.
މިއަދު ސަރުކާރު ބަންދުކުރުމަށް ރައީސުލްޖުމްހޫރިއްޔާ ނިންމެވީ، މިހާރު ރާއްޖެއަށް ކުރަމުންދާ ވިއްސާރައިގެ ސަބަބުން ގިނަ ރަށްތަކެއްގައި ފެންބޮޑުވެފައިވާތީއެވެ. މި ހާލަތާ ގުޅިގެން ރައްޔިތުންނަށް ކުރިމަތިވާ ކަންކަން މޮނިޓަރކޮށް އަވަސް ހައްލެއް ހޯދުމަށް ރައީސް ޑރ. މުހައްމަދު މުއިއްޒު އިސްކޮށް ހުންނަވައި ރޭ ވަނީ ޓާސްކް ފޯހެއް ވެސް އެކުލަވާލައްވާފައެވެ.
އަދި މިކަމާ ގުޅިގެން އޭޑީކޭ ހޮސްޕިޓަލުން ވެސް ވަނީ އެ ހޮސްޕިޓަލުގެ ޚިދުމަތްތަކަށް ބަދަލު ގެނެސްފައެވެ. އެގޮތުން އޭޑީކޭ ހޮސްޕިޓަލުގެ އާންމު ކްލިނިކްތައް މިއަދު ބަންދުކުރާނެ ކަމަށާއި، ނަމަވެސް އިމަޖެންސީ ޑިޕާޓްމަންޓް އާއި އެޑްމިޝަން ސަރވިސަސް އަދި ލެބޯޓްރީގެ ޚިދުމަތްތައް މެދުނުކެނޑި ކުރިއަށްދާނެ ކަމަށް އެ ހޮސްޕިޓަލުން ބުނެފައިވެއެވެ.
ކޮމެންޓް