މިހާރު ކުރަމުންދާ ވިއްސާރައިގައި މާލޭގެ ގިނަ ގެތަކަށް ފެން ވަދެއްޖެ

މިއަދު މެންދުރު ފަހުން ފެށިގެން މާލެއަށް ކުރަމުންދާ ބޯ ވިއްސާރައިގައި މާލޭގެ ގިނަ އަދަދެއްގެ ގެތަކަކަށް ފެން ވަދެގެން ކަމާބެހޭ ފަރާތްތަކުން ހަރަކާތްތެރިވަމުންދާ ކަމަށް އެމްއެންޑީއެފްއިން ބުނެފިއެވެ.

އެމްއެންޑީއެފް އިން މިއަދު އެކްސްގައި ކުރި ޕޯސްޓެއްގައި ބުނި ގޮތުގައި މިހާތަނަށް 183 ގެއަކަށް ފެން ވަދެފައިވާ ކަމުގެ ރިޕޯޓު ލިބިފައިވެއެވެ. އަދި އެ ފަރާތްތަކަށް އެހީތެރިކަން ފޯރުކޮށްދިނުމަށް އެމްއެންޑީއެފް މާލޭ އޭރިއާ ކޮމާންޑުން ދަނީ ގިނަ އިދާރާތަކަކާ ގުޅިގެން ހަރަކާތްތެރިވަމުންނެވެ.

މާލޭގެ ގޭގެއަށް ފެންވަންނަމުންދާތީ އެމްއެންޑީއެފް އިން ދަނީ ގޭގޭގައި ވެލި ބަސްތާ ޖަހައިދެމުންނެވެ. އެގޮތުން، މިހާތަނަށް 48 ގެއެއްގައި ޖުމްލަ 136 ވެލި ބަސްތާ ޖަހައިދީފައިވާ ކަމަށް އެމްއެންޑީއެފް އިން ބުންޏެވެ.

މިއަދު މެންދުރުކުރިން ފެށިގެން މާލެއަށް ބޯކޮށް ވާރޭ ވެހި، ހިނގާބިނގާވެ އުޅުމަށާއި ދުއްވާއެއްޗެހި ދުއްވަން ދަތިވާ ވަރަށް މަގުތަކުގައި ވަނީ ފެންބޮޑުވެފައެވެ. މަގުތަކުން ފެން ހިންދައި އާއްމުންނަށް އެހީތެރިކަން ފޯރުކޮށްދިނުމަށް ސިފައިން ހަރަކާތްތެރިވަމުންދާ އިރު، މަގުތަކުގައި ހެދިފައިވާ ފެންގަނޑު ހިނދެންދެން މާލޭގައި ބަރު ވެހިކަލް ވެސް ނުދުއްވަން ވަނީ އަންގާފައެވެ.

މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން މިއަދު ނެރުނު ނޫސްބަޔާނެއްގައި ބުނެފައިވަނީ މިއަދު ރޭގަނޑުގެ ވަގުތުތަކުގައި ވެސް ރާއްޖޭގެ އެކި ސަރަހައްދުތަކަށް ވިއްސާރަވެ، ވާރޭވެހުމުގެ ފުރުސަތު އޮތް ކަމަށެވެ. އަދި މާދަމާ ވެސް ރާއްޖޭގެ ގިނަ ސަރަހައްދުތަކަށް ވިއްސާރަވެ، ވާރޭވެހުމުގެ ފުރުސަތު އޮތް ކަމަށް މެޓް އޮފީހުން ބުނެފައިވެއެވެ. އެހެންކަމުން، ދަތުރުފަތުރު ކުރާއިރު ސަމާލުވުމަށް އާންމުންނަށް އިރުޝާދު ދީފައިވެއެވެ.

ރާއްޖެއަށް ބޯކޮށް ވިއްސާރަކުރަމުން ދިއުމާއި ގުޅިގެން މާދަމާއަކީ ސަރުކާރު ބަންދު ދުވަހެއްގެ ގޮތުގައި ރައީސުލް ޖުމުހޫރިއްޔާ މިހާރު ވަނީ ނިންމަވާފައެވެ.