މާލޭގެ މަގުތައް ހަދާ ނިމުމުން ފެންބޮޑުވުމުގެ މައްސަލަ ހައްލުވެގެންދާނެ: ރައީސް މުއިއްޒު
މާލެއިން ފެންހިންދުމުގެ މަސައްކަތުގައި ސިފައިން ހަރަކާތްތެރިވަނީ / ފޮޓޯ:އެމްއެންޑީއެފް
މިސަރުކާރުން ފެށުމަށް ހަމަޖެހިފައިވާ މާލޭގެ މަގުތައް ޒަމާނީ ފެންވަރަށް ހެދުމުގެ މަޝްރޫޢު ނިމިގެންދާއިރު މާލެއަށް ކުރިމަތިވާ ފެންބޮޑުވުމުގެ މައްސަލައަށް ދާއިމީ ހައްލެއް ލިބިގެންދާނެކަމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މުހައްމަދު މުއިއްޒު މިއަދު 'އެކްސް' ގައި ކުރެއްވި ޕޯސްޓެއްގައި ވިދާޅުވެފައިވަނީ، މާލޭގެ މަގުތައް ޒަމާނީ ފެންވަރަކަށް ހެދުމަށް ފަށާ މަޝްރޫއަކީ މާލޭގައި ޒަމާނުއްސުރެ ދިމާވާ ފެންބޮޑުވުމުގެ މައްސަލައަށް ހައްލު އަންނާނެ މަޝްރޫއެއް ކަމަށެވެ. އަދި ވިއްސާރައިގައި ގެއްލުންވަމުންދާ ރައްޔިތުންނަށް އެހީތެރިކަން ފޯރުކޮށްދިނުމަށް އެންމެ އިސްކަން ދީގެން މަސައްކަތް ކުރާނެ ކަމަށްވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވެފައިވަނީ، ވިއްސާރައިގައި އާންމު ދިރިއުޅުމަށާއި ގެދޮރާއި މުދަލަށް ލިބޭ ގެއްލުން ކުޑަކުރުމަށް ކުރަންޖެހޭ މުހިންމު މަސައްކަތްތައް ކުރުމުގައި އެންމެންގެ އެއްބާރުލުން ލިބޭނަމަ، އެ މަސައްކަތްތަކުގެ ނަތީޖާ ނެރެވިދާނެ ކަމަށެވެ. މާލޭގެ ހުރިހާ މަގުތައް ރަނގަޅު ފެންވަރަކަށް ހެދުމަށް ފަށާ މަޝްރޫއުގެ އެންމެ މުހިންމު އެއް އަމާޒަކީ މާލޭގައި ފެން ބޮޑުވުން ހައްލުކުރުން ކަމަށްވެސް ރައީސް ފާހަގަކުރެއްވިއެވެ.
" ރާއްޖޭގެ ގިނަ ރަށްތަކެއްގެ މަގުހެދުމުގެ މަޝްރޫއު ކޮންމެ އަހަރަކުވެސް ޕްލޭން ކޮށްފައިވާ ގޮތަށް، އިސްކަންދީގެން ކުރިޔަށް ގެންދެވުމުން އެ ރަށްރަށުގައިވެސް އެ ޙައްލު ލިބިގެންދާނެ." ރައީސްގެ މެސެޖު ނިންމާލައްވަމުން ވިދާޅުވެފައި ވެއެވެ.
ރައީސް ޑރ. މުހައްމަދު މުއިއްޒު މި ފަދައިން ޕޯސްޓެއް ކުރައްވާފައި މިވަނީ މިހާރު ރާއްޖެއަށް ކުރަމުންދާ ވިއްސާރައިގައި ރާއްޖޭގެ ގިނަ ރަށްތަކެއްގައާއި، އަދި ވެރިކަން ކުރާ މާލޭގައި ވަރަށް ބޮޑަށް ފެން ބޮޑުވެ އާއްމުންނަށް ވަރަށް ބޮޑުދަތި ތަކަކާއި ކުރިމަތިލާން ޖެހިފައިވާ ދަނޑިވަޅެއްގައެވެ.
މިއަދު މާލެއަށް ކުރަމުންދާ ވިއްސާރައިގައި ފެން ބޮޑުވުމުގެ ސަބަބުން ފެންހިންދުމުގެ މަސައްކަތް ކުރުމަށް ސިފައިންވަނީ މަގުތަކަށް ނިކުމެފައެވެ.
ކޮމެންޓް