އޯލެވެލް އިމްތިހާނުގެ ނަތީޖާ މިއަދު ދޫކުރަން ފަށައިފި

މިއަދަކީ ގިނަ ކކުދިންނާއި ބެލެނެވެރިން އިންތިޒާރުކުރަމުން އައި ދުވަހެއް

މިދިޔަ މެއި އަދި ޖޫން މަހު ބޭއްވުނު ކޭމްބްރިޖް އޯލެވެލް އިމްތިހާނުގެ ނަތީޖާ މިއަދު ދޫކުރަން ފަށައިފި އެވެ. ޑިޕާޓްމެންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން މަޢުލޫމާތު ދެއްވި ގޮތުގައި، ދަރިވަރުންގެ ނަތީޖާ މިއަދު މެންދުރު 12:00 އިން ފެށިގެން އެ އިދާރާއިން ދޫކުރަމުން ގެންދާނެ އެވެ.

މި އަހަރުގެ އޯލެވެލް އަދި އެސްއެސްސީ އިމްތިހާނުގައި ޖުމްލަ 7،501 ދަރިވަރުން ބައިވެރިވެފައިވާ ކަމަށް ޑީޕީއީ އިން ހާމަކުރި އެވެ. މި އިމްތިހާނުތައް ބޭއްވިފައިވަނީ މުޅި ރާއްޖޭގެ 256 ސެންޓަރެއްގައެވެ. މިއީ މިދިޔަ އަހަރާ އަޅާބަލާއިރު 803 ދަރިވަރުންގެ އިތުރުވުމެކެވެ. މިދިޔަ އަހަރު އޯލެވެލް އިމްތިހާނުގައި ބައިވެރިވެފައިވަނީ 6،698 ދަރިވަރުންނެވެ.

އަދި ދިވެހި އަދި އިސްލާމް މާއްދާ ހިމެނޭ އެސްއެސްސީ އިމްތިހާނުގައި މި އަހަރު 7،133 ދަރިވަރުން ބައިވެރިވެފައިވާ ކަމަށް ޑީޕީއީ އިން ބުނެފައިވެ އެވެ.

އޯލެވެލްގެ ނަތީޖާ މިއަދު ދޫކުރަން ފެށުމާ ގުޅިގެން، މަތީ ސާނަވީއަށް ކިޔަވައިދޭ ސްކޫލުތަކުން އެ ތަންތަނަށް ވަނުމުގެ ފުރުސަތު މިހާރު ވަނީ ހުޅުވާލާފައެވެ.

ޖީސީ އޯލެވެލް