ހއ. ކެލައަށް އިއްޔެ ބޯކޮށް ވާރޭވެހި، 24 ގަޑިއިރުގެ ތެރޭގައި އެންމެ ގިނައިން ވާރޭވެހުނު ރަށަކަށް ވެއްޖެ

ހއ. ކެލައަށް އިއްޔެ ވަރަށް ބޯކޮށް ވާރޭވެހި، 24 ގަޑިއިރުގެ ތެރޭގައި އެންމެ ގިނައިން ވާރޭވެހުނު ކަމަށް ރެކޯޑް ކުރެވުނު ރަށަކަށް ވެއްޖެ އެވެ. މިކަން ހާމަކޮށްފައިވަނީ ރާއްޖޭގެ މޫސުމާ ބެހޭ އިދާރާ މެޓް އޮފީހުން މިއަދު ނެރުނު ނޫސްބަޔާނެއްގައެވެ.

މެޓް އޮފީހުގެ ބަޔާނުގައި ބުނެފައިވަނީ މިދިޔަ ތިން ދުވަހު ރާއްޖޭގެ ބޮޑު ބަޔަކަށް ބޯކޮށް ވާރޭވެހި، ވައިގަދަވެފައިވާ ކަމަށެވެ. އަދި އިއްޔެ އެންމެ ބޯކޮށް ވާރޭވެހުނު ކަމަށް ރެކޯޑް ކުރެވިފައި ވަނީ ހއ. ކެލާގެ އޮޓޮމެޓިކް ވެދާ ސްޓޭޝަނަށް ކަމަށް ވެސް އެ އިދާރާއިން ބުންޏެވެ.

ކެލައަށް އިއްޔެ ވަނީ 231.5 މިލިމީޓަރުގެ ވާރޭވެހިފަ އެވެ. މެޓް އޮފީހުން ބުނީ މިއީ މިހާތަނަށް އޮޓޮމެޓިކް ވެދާ ސްޓޭޝަނަކުން 24 ގަޑިއިރަށް ރެކޯޑްކުރެވިފައިވާ އެންމެ މަތީ އަދަދު ކަމަށެވެ.

ވިލާގަނޑުގައި އެންމެ ވައިގަދަވެފައިވާ ކަމަށް އިއްޔެ ރެކޯޑް ކުރެވިފައި ވަނީ ފ. ނިލަންދު އަށެވެ. އެއީ، ގަޑިއަކު 46 މޭލަށެވެ. މިހާރު އެންމެ މޫސުން ގޯހީ ރާއްޖޭގެ އުތުރުގެ ރަށްތަކަށެވެ. މެޓުން އިއްޔެ ވަނީ ހަތަރު ގަޑިއިރަށް ހއ. އަތޮޅުން ފެށިގެން ށ. އަތޮޅަށް އޮރެންޖު އެލާޓް ވެސް ނެރެފަ އެވެ. އެ ހިސާބުގެ ބައެއް ރަށްތަކުގައި ވަރަށް ބޮޑަށް ފެންބޮޑުވެގެން އެންޑީއެމްއާ އަށް ރިޕޯޓު ވެސް ކޮށްފައިވެ އެވެ.