ސްކޫލަކަށް ވަދެ ޓީޗަރުންނަށް ބިރުދެއްކި ބެލެނިވެރިޔަކު 30 ދުވަހަށް ބަންދުކޮށްފި
ސްކޫލުތަކަކީ ވަރަށް ބޮޑަށް ރައްކާތެރި ކުރެވިފައިވާ ތަންތަނެވެ.
މާލޭގެ ސްކޫލަކަށް ވަދެ، ދަރިވަރުން ކުރިމަތީގައި ޓީޗަރުންނަށް ބިރުދެއްކި ކަމުގެ ތުހުމަތުގައި އެ ސްކޫލުގެ ބެލެނިވެރިޔަކު ހައްޔަރުކޮށް، 30 ދުވަހަށް ބަންދުކޮށްފި އެވެ.
މިދިޔަ ހަފްތާގެ ހޯމަ ދުވަހު ހެނދުނުގެ ވަގުތެއްގައި ހިނގި މި ހާދިސާއާ ގުޅިގެން މިދިޔަ އަންގާރަ ދުވަހު ފުލުހުން ހައްޔަރުކޮށްފައި ވަނީ އުމުރުން 41 އަހަރުގެ ދިވެހި ފިރިހެނެކެވެ. ކޯޓު އަމުރުތަކުން އެނގޭ ގޮތުގައި އޭނާ ހައްޔަރުކޮށްފައި ވަނީ އެ ސްކޫލްގެ ކްލަސްރޫމްތަކަށް ވަދެ ހަމަނުޖެހުން ހިންގި ކަމުގެ ތުހުމަތުގަ އެވެ.
ފުލުހުން ބުނާ ގޮތުގައި އޭނާ ވަނީ ކުދިން ކުރިމަތީގައި ޓީޗަރުންނަށް ބިރުދައްކާފައެވެ. އަދި ސްކޫލްގެ މުވައްޒަފުންނާ ޒުވާބުކޮށް، ބިރުދައްކާފައިވާ ކަމަށް ވެސް ފުލުހުން ބުނެއެވެ. ނަމަވެސް މުވައްޒަފުންނަށް ބިރުދެއްކި ނަމަވެސް އެއްވެސް މީހެއްގެ ގައިގައި އަތްލާފައެއް ނުވާ ކަމަށް ވެސް ފުލުހުން ބުނެއެވެ.
ފާހަގަކޮށްލެވޭ ކަމަކީ އޭނާއަކީ ބިރުދެއްކުމުގެ މައްސަލަތަކެއްގައި ކުށުގެ ރިކޯޑް އޮންނަ މީހެއް ކަމެވެ. އަދި މި އަމަލު ހިންގާފައި ވަނީ ސްކޫލެއްގެ ތެރޭގައި ކުޑަކުދިންގެ ހިތްތަކުގައި ބިރުވެރިކަން އުފެދޭ ގޮތަށް އެކަމަށް އެއްވެސް ފަރުވާލެއް ނުހައްޓާކަން ވެސް ބަންދު އަމުރުގައި ފާހަގަކޮށްފައިވެ އެވެ.
އެކަންކަމަށް ރިއާޔަތްކުރައްވައި، ކްރިމިނަލް ކޯޓުގެ ގާޒީ އިސްމާއީލް ޝަފީއު އަމުރުކުރެއްވީ އޭނާ 30 ދުވަހަށް ބަންދުގައި ބެހެއްޓުމަށެވެ.
ކޮމެންޓް