ބަންގްލަދޭޝްއަށް މިވަނީ ދަރިވަރުންގެ އިންގިލާބެއް އައިސްފައި: ވަގުތީ ލީޑަރ ޔޫނުސް

ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ވެރިކަން ވައްޓާލުމަށް ފަހު، އެ ގައުމުގައި މިހާރު ދެކެމުން މި ދަނީ ދަރިވަރުންގެ އިންގިލާބީ ބަދަލެއް ކަމަށް ވަގުތީ ސަރުކާރުގެ ލީޑަރު މުހައްމަދު ޔޫނުސް އިއްޔެ ވިދާޅުވެއްޖެ އެވެ.

ނޯބެލް އިނާމު ލިބިވަޑައިގެންފައިވާ ޔޫނުސް، ނޫސްވެރިންގެ ބައްދަލުވުމެއްގައި ވިދާޅުވީ "މިއީ އިންގިލާބެއް. ދަރިވަރުން ގެނައި އިންގިލާބެއް" ކަމަށެވެ. އަދި އޭގެ ސަބަބުން މުޅި ސަރުކާރު ހުއްޓުމަކަށް އައިސްފައިވާތީ، މިއީ އިންގިލާބެއްކަމާމެދު އެއްވެސް ޝައްކެއް ނެތް ކަމަށް އޭނާ ވިދާޅުވި އެވެ.

އުމުރުން 84 އަހަރުގެ ޔޫނުސް އެނބުރި ބަންގްލަދޭޝަށް ވަޑައިގަތީ ހަސީނާގެ ވެރިކަން ވައްޓާލުމަށް ކުރި މުޒާހަރާތަކުގެ ދަރިވަރުންގެ ލީޑަރުން، ވަގުތީ ސަރުކާރު ހިންގައިދިނުމަށް އޭނާގެ ކިބައިން އެދުމުންނެވެ. ޔޫނުސް ވިދާޅުވީ ދަރިވަރުންނަށް އިހްތިރާމް ކުރައްވާ ކަމަށާއި، ދަރިވަރުން މަސައްކަތްކުރި ގޮތް ޝައުގުވެރިކަމަށެވެ.

މީގެ ހަފުތާއެއް ކުރިން ހަސީނާ ކުއްލި ގޮތަކަށް އިސްތިއުފާ ދެއްވައި އިންޑިއާއަށް ފުރާވަޑައިގަތް އިރު، ހަސީނާގެ ސަރުކާރުގެ އިސް ބައެއް ބޭފުޅުން ވެސް ވަނީ މަގާމުތަކުން އިސްތިއުފާ ދެއްވާފައެވެ. މީގެ ތެރޭގައި އުއްތަމަ ފަނޑިޔާރާއި މަރުކަޒީ ބޭންކުގެ ގަވަރުނަރު ހިމެނެ އެވެ. މި ބޭފުޅުން އިސްތިއުފާ ދެއްވީ ދަރިވަރުންގެ ލީޑަރުން އެ ބޭފުޅުން އިސްތިއުފާ ދިނުމަށް މުހުލަތެއް ދިނުމާ ގުޅިގެންނެވެ.

ނަމަވެސް، ޔޫނުސް ވިދާޅުވީ އެ ބޭފުޅުންގެ އިސްތިއުފާގެ ކަންކަން ކުރިއަށް ދިޔައީ ގާނޫނާ އެއްގޮތަށް ކަމަށެވެ. "އެ ކުދިން ބޭނުންވަނީ އާ ކޯޓެއް އެކުލަވާލަން. އެހެންވެ އެތަނަށް ގޮސް، އުއްތަމަ ފަނޑިޔާރު އިސްތިއުފާ ދެއްވުމަށް އެދި ޕްރެޝަރުކުރީ," ދަރިވަރުންނާ ބެހޭ ގޮތުން އޭނާ ވިދާޅުވި އެވެ. އަދި އިތުރަށް ވިދާޅުވީ "އަޅުގަނޑަށް ޔަގީން، އެ ކުދިން މި ހުރިހާ ކަމެއް ދިފާއު ކުރެވޭނެ ގާނޫނީ މަގެއް ހޯދާނެ. ސަބަބަކީ ގާނޫނީ ގޮތުން... ހުރިހާ ފިޔަވަޅެއް ވެސް އަޅަމުން ދިޔަ" ކަމަށެވެ.

ބަންގްލާދޭޝްގެ ދަރިވަރުން މިދިޔަ މަހު މުޒާހަރާތައް ފެށީ ސިވިލް ސާވިސް ވަޒީފާތަކަށް މީހުން ނެގުމަށް ގެންގުޅޭ އުސޫލު އުވާލުމަށް އެދި އެވެ. އެކަމަކު އެކަން ނުކޮށް ބާރުގެ ބޭނުންކޮށްގެން މުޒާހަރާތައް ރޫޅާލުމުގެ ތެރޭ އެތައް ދަރިވަރުންނެއް މަރުވުމާ އެކު މުޒާހަރާ މެދުކަނޑާލައި މި މަހު އަލުން ފެށީ ހަސީނާގެ ވެރިކަން ވައްޓާލަން އަމާޒު ހިފައިގެންނެވެ. ހަސީނާ އިސްތިއުފާ ދެއްވީ ދަރިވަރުންގެ މުޒާހަރާގައި އެތައް މިލިއަން ބަޔަކު ބައިވެރިވެ ހަސީނާގެ ރަސްމީ ގެކޮޅު ކައިރިއަށް ޖަމާވާން ފެށުމާ އެކުގަ އެވެ.