ސަރުކާރު ހިންގުމުގެ ހުރިހާކަމެއްގައި ޒުވާނުންނަށް ބަސްކިޔޭނެ: ރައީސް މުއިއްޒު
ޒުވާނުންގެ ލަފާދޭ ކޮމެޓީގެ ފުރަތަމަ ބައްދަލުވުމުގެ ތެރެއިން / ފޮޓޯ:ރައީސް އޮފީސް
އަދުގެ ސަރުކާރު ހިންގުމުގެ ހުރިހާ ކަމެއްގައި ދިވެހި ޒުވާނުންނަށް ބަސް ކިޔޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު އިފްތިތާޙްކުރެވުނު ދިވެހި ޒުވާނުންގެ ޤައުމީ ލަފާދޭ ކޮމިޓީގެ ފުރަތަމަ ބައްދަލުވުމުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ޒުވާނުންގެ ފަރާތުން ދައުލަތް ހިންގުމާއި ދައުލަތުގެ އެހެނިހެން ކަންކަން ބައްޓަންކުރުމުގައި އެމީހުންގެ ބަސް އިއްވަން ޖެހޭ ކަމަށެވެ. އަދި އެމަނިކުފާނަށް ލަފާދޭ ކޮމިޓީއެއް އުފެއްދީ ސަރުކާރު ހިންގުމުގައި ދިވެހި ޒުވާނުންގެ އަޑު އަހަން ބޭނުންވާތީ ކަމަށެވެ.
ރައީސް އިތުރަށް ވިދާޅުވީ، ދިވެހިރާއްޖޭގެ އިމުގެ ތެރޭގައި ހިނގާ ކޮންމެ ކަމެއްގައި އަދި އެމަނިކުފާނުގެ ޤާނޫނީ ޒިންމާ އަދާކުރުމުގައި އެ ކޮމިޓީން ލަފާދެއްވޭނެ ކަމަށެވެ. އަދި މިނިވަން ޚިޔާލުގައި، ވަކި ވިސްނުމެއް ނެތި މަސައްކަތްކުރުމުގެ ފުރުޞަތު އެ ކޮމިޓީގެ މެންބަރުންނަށް އޮތްކަންވެސް ފާހަގަކުރެއްވިއެވެ.
ޤައުމުގެ އާބާދީގެ އެންމެ ބޮޑު ހިއްސާއެއް ކުރަނީ ޒުވާނުންކަން ފާހަގަކުރައްވަމުން، ޒުވާނުންގެ ފަރާތުން ޤައުމުގެ ކަންކަމާ މެދު ބަސް އިއްވުމަކީ ލިބިގެންދާނެ ފަސޭހައެއް ކަމަށް ރައީސް ވިދާޅުވިއެވެ.
"އަޅުގަނޑުދޭ ޔަގީންކަމަކީ މިގޮތަށް އަޅުގަނޑަށް ހުށަހަޅާ ކަންކަން އަޅުގަނޑު ބަލައިގަންނާނަމޭ. އިރާދަކުރެއްވިއްޔާ ވީވަރަކުން އެންމެ ރަނގަޅަކަށް އެކަންކަން ރާއްޖޭގައި ތަންފީޒު ކުރުމަށް ކަންކަން ފަހި ކުރާނަން" ރައީސް ޑރ. މުޢިއްޒު ވިދާޅުވިއެވެ.
ކޮމެންޓް