އާސަންދައާއި އެންސްޕާގެ ޚިދުމަތްތައް އިތުރަށް ހަރުދަނާކޮށް، ޙައްޤުވެރިންނަށް ފަސޭހައިން ލިބޭނެ ގޮތަށް އިޞްލާޙު ގެންނަނީ

އާސަންދަ އަދި އެންސްޕާއަށް ގެނެވޭ އިޞްލާޙުތަކަކީ، އެންމެ ބޭނުންޖެހިފައިވާ ފަރާތްތަކަށް ފުރިހަމައަށް ޚިދުމަތް ފޯރުކޮށްދޭ ނިޒާމަކަށް ބަދަލުކުރުމަށް ކުރެވޭ މަސައްކަތްތަކެއް ކަމުގައި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ. މި ބަސްފުޅު އޭނާ ދެއްކެވީ ރައްޔިތުންގެ މަޖިލީހުގެ އިޖްތިމާޢީ ކޮމިޓީގައި ވާހަކަފުޅު ދައްކަވަމުންނެވެ.

ރައްޔިތުންގެ މަޖިލީހުގެ އިޖްތިމާޢީ ކޮމިޓީން ވަނީ އެންސްޕާ އަދި އާސަންދައިގެ އިސްވެރިންނާ ބައްދަލުކުރައްވާފައެވެ. މި ބައްދަލުވުމުގައި ކޮމިޓީގެ މެންބަރަކު ކުރެއްވި ސުވާލަކަށް ޖަވާބު ދެއްވަމުން، އެންސްޕާގެ ސީއީއޯ ހީނާ ވަލީދު ވަނީ އެންސްޕާ އަދި އާސަންދަ ނިޒާމު އިޞްލާޙުކޮށް ހަރުދަނާކުރުމަށް ކުރަމުންދާ ބައެއް މަސައްކަތްތައް ހާމަކުރައްވާފައެވެ.

މި ގޮތުން، އާސަންދަ ނިޒާމަށް ގެނެވޭ ބަދަލުތަކާއެކު، އަންނަ އޮކްޓޯބަރު މަހުން ފެށިގެން އިސްކަންދެވޭނީ އަމިއްލަ އިންޝުއަރެންސްތަކަށް ކަމަށް އޭނާ ވިދާޅުވިއެވެ. މީގެ އެންމެ މުހިންމު އެއް މަޤްޞަދަކީ އާސަންދަ ނިޒާމަކީ އެންމެ ބޭނުންޖެހިފައިވާ ފަރާތްތަކަށް ޚިދުމަތް ލިބޭ ނިޒާމަކަށް ހެދުން ކަމުގައި ހީނާ ވަލީދު ފާހަގަކުރެއްވިއެވެ.

"އިޞްލާޙީ މަސައްކަތުގެ ތެރެއިން، 1 އޮކްޓޯބަރު 2023 އިން ފެށިގެން ތަންފީޛުކުރަން ފަށާ ބައެއް އައު އުސޫލުތައް ވަނީ ކަނޑައެޅިފައެވެ. މީގެ ތެރޭގައި، އިތުރު ޞިއްޙީ އިންޝުއަރެންސެއް އޮންނަ ފަރާތްތަކުގެ ބިލު ކްލިއަރކުރުމުގައި، ފުރަތަމަ އެ އިންޝުއަރެންސްއިން ކްލިއަރކުރުމަށްފަހު، ބާކީ އޮންނަ ބައި އާސަންދަ އެންސްޕާގެ ތެރެއިން ކްލިއަރކުރުން ހިމެނެއެވެ. މީގެ އިތުރުން، އިޖްތިމާޢީ ރައްކާތެރިކަމުގެ އުސޫލުތަކާއި އާސަންދައިގެ އުސޫލުތަކަށް ބައެއް ބަދަލުތައް ގެނައުމުގެ މަސައްކަތް ދަނީ ކުރެވެމުންނެވެ. މި ބަދަލުތަކުގެ އިބްތިދާއީ ކަރުދާސްތައް މިހާރު ވަނީ އެކުލަވާލެވި، އަވަސް މުސްތަޤުބަލެއްގައި އިޞްލާޙުތަކާއެކު ވަޒީރުންގެ މަޖިލީހަށް ހުށަހެޅޭނެއެވެ." ހީނާ ވިދާޅުވިއެވެ.

އެންސްޕާގެ ސީއީއޯ ހީނާ ވަލީދު ވިދާޅުވި ގޮތުގައި، ދިވެހިރާއްޖޭގެ އަމިއްލަ ހޮސްޕިޓަލްތަކުން ފޯރުކޮށްދޭ ޚިދުމަތްތަކުގެ އަގު ވަރަށް މަތިވެފައިވެއެވެ. މީގެ އެންމެ ބޮޑު ބުރަ އުފުލަންޖެހެނީ އެންސްޕާއަށެވެ. މިފަދައިން ދިމާވަނީ، ރާއްޖޭގައި ކުރަންޖެހޭ ބޮޑެތި ޖަރާޙީ ފަރުވާތައް ސަރުކާރުގެ ހޮސްޕިޓަލްތަކުން ނުދެވޭތީއެވެ. މި ބުރަ ލުއިވާނީ ސަރުކާރުގެ ހޮސްޕިޓަލްތަކުގައި މިފަދަ ވަސީލަތްތައް ޤާއިމުކުރެވިގެންކަމަށް އެމަނިކުފާނު ފާހަގަކުރެއްވިއެވެ.