ހުޅުމާލޭގެ ދުވާރުމަތިން ގޮނޑި މޭޒު ނެގުމުގެ މަސައްކަތް ފަށައިފި

ގޮނޑި މޭޒު ނެގުމުގެ މަސައްކަތް އެޗްޑީސީން ކުރިއަށް ގެންދަނީ / ފޮޓޯ:އެޗްޑީސީ

ހުޅުމާލެ އަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި މޭޒު ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް މިއަދު ފަށާފައިވާ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހާމަކޮށްފިއެވެ.

އެޗްޑީސީން މިކަމާ ގުޅޭގޮތުން ދެ އިއުލާނެއް ކޮށްފައިވެއެވެ. އެގޮތުން 2023 ނޮވެމްބަރ 15 އަދި 2024 ޖުލައި 23 ގައި ކުރި އިއުލާންތަކުގައި ދުވާރު މައްޗާއި މަގުމަތީގައި ބަހައްޓާފައިވާ ގޮނޑިމޭޒު ނެގުމަށް ވަނީ އަންގާފައެވެ. މި އިއުލާންތަކުގައި ދުވާރުމައްޗާއި، މަގުމަތީގައި ގޮނޑިއާއި މޭޒު ބަހައްޓައިގެން ވިޔަފާރި އުޞޫލުން ޚިދުމަތްދިނުމަކީ މަނާކަމެއް ކަމަށް އެޗްޑީސީ އިން ވަނީ ބަޔާންކޮށްފައެވެ.

އިއުލާންގައި ދީފައިވާ ސުންގަޑިއަށް މި ތަކެތި ނުނަގައިފިނަމަ، އެޗްޑީސީން ކަމާ ގުޅުންހުރި އިދާރާތަކާ ގުޅިގެން އެތަކެތި ނަގައި އެސަރަހައްދުތައް ސާފުކުރުމުގެ މަސައްކަތް ކުރިއަށް ގެންދާނެކަމަށް ވެސް އަންގާފައިވެއެވެ. އަދި މި މަސައްކަތުގެ ތެރޭގައި މުދަލަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެކަމަށް ވެސް ވަނީ ބުނެފައެވެ.

އިއުލާންތަކުގައި ދީފައިވާ މުއްދަތުގައި ތަކެތި ނުނަގާ ހުރުމާ ގުޅިގެން، އެޗްޑީސީން މިހާރު ވަނީ އެތަކެތި ނެގުމުގެ މަސައްކަތް ފަށާފައެވެ. މި މަސައްކަތަކީ ހުޅުމާލެ އަކީ ހިތްފަސޭހަ އަދި ރީތި ތަނަކަށް ހެދުމަށްޓަކައި ކުރެވޭ މަސައްކަތްތަކުގެ ތެރެއިން ބައެއް ކަމަށް އެޗްޑީސީން ފާހަގަކޮށްފައިވެއެވެ.

އެޗްޑީސީ