ބިދޭސީ މަސައްކަތްތެރިންނާ ގުޅޭ ބިލަށް އެމްޓީޔޫސީން އިސްލާހު ހުށަހަޅައިފި

ވަޒީފާއާބެހޭ ގާނޫނަށް އިސްލާހު ގެނައުމުގެ ބިލުގައި ބިދޭސީ މަސައްކަތްތެރިން އިތުރުވުމަކީ ގައުމީ ސަލާމަތަށް ނުރައްކަލެއް ކަމަށް ސިފަކޮށްފައި އޮތްއޮތުން އުނިކުރުމަށް މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން އިސްލާހު ހުށަހަޅައިފިއެވެ.

ރާއްޖޭގައި ބިދޭސީން ވަޒީފާއަދާކުރުމާ ގުޅޭގޮތުން ވަޒީފާއާބެހޭ ގާނޫނުގައި ކަނޑައަޅާފައިވާ އުސޫލުތައް އިސްލާހުކުރުމަށް ކުޅުދުއްފުށި އުތުރު ދާއިރާގެ މެންބަރު މުހައްމަދު ދާއޫދު މިދިޔަ މަހުގެ 23 ވަނަ ދުވަހު ރައްޔިތުންގެ މަޖިލީހަށް ހުށަހެޅުއްވި ބިލު މިހާރު ދަނީ މަޖިލީހުގެ ސަލާމަތީ ހިދުމަތްތަކާބެހޭ 241 ކޮމިޓީން ދިރާސާކުރަމުންނެވެ.

މަސައްކަތްތެރިންގެ ހައްގުތަކުގެ ދިފާއުގައި މަސައްކަތްކުރާ އެމްޓީޔޫސީން މިދިޔަ ބުރާސްފަތި ދުވަހު ވަނީ އެ ބިލަށް އިސްލާހުތަކެއް ހުށަހަޅާފައެވެ. އެގޮތުން އެ ބިލުގެ 65 ވަނަ މާއްދާއަށް ތިން އިސްލާހެއް ހުށަހަޅާފައިވެއެވެ. އެ މާއްދާއަކީ ރާއްޖެއަށް ބިދޭސީން ގެނެވޭނެ އަދަދާއި ދާއިރާތައް ކަނޑައެޅުމުގެ އުސޫލުތައް ބަޔާންކުރާ މާއްދާއެވެ.

މިހާރު މަޖިލީހުގައި އޮތް ބިލުގެ 65 ވަނަ މާއްދާގައި ވާގޮތުން ބިދޭސީން ގެނެވޭނެ އަދަދުތައް ކަނޑައަޅަންވާނީ ރާއްޖޭގެ ވަޒީފާގެ ބާޒާރަށް ކުރާނެ އަސަރު ދެނެގަތުމަށްޓަކައި ހަދާ އެސެސްމަންޓަކަށް ފަހު ވަޒީރުންގެ މަޖިލީހުގެ ލަފާގެ މަތިންނެވެ. އަދި އެ އަދަދު ކަނޑައެޅުމުގައި ވަކި ކަންކަމަކަށް ރިއާޔަތްކުރަންޖެހޭނެ ކަމަށް ވެސް ބުނެފައިވެއެވެ.

އެމްޓީޔޫސީން ބިލަށް ހުށަހެޅި އިސްލާހުގައި ހިމެނެނީ ބިދޭސީ މަސައްކަތްތެރިން އިތުރުވުމަކީ ގައުމީ ސަލާމަތަށް ނުރައްކަލެއް ކަމަށް ސިފަކޮށްފައިވާ ބައި އުނިކުރުމަށާއި، ރާއްޖޭގެ މުހިންމު ސިނާއަތްތަކަށް ކޯޓާގެ މިންގަނޑުތަކެއް ކަނޑައެޅުމަށާއި، ފަތުރުވެރިކަމުގެ ދާއިރާގައި އެންމެ މަދުވެގެން %50 އިންސައްތަ ދިވެހިން ތިބެންޖެހޭ ކަމަށް ބިލުގައި ހިމެނުމަށެވެ. އަދި ބިދޭސީންގެ ކޯޓާގެ ތަފްސީލު ކޮންމެ އަހަރަކު ހަތަރު ފަހަރު އާންމުކުރުމަށް ލާޒިމުކުރުމަށްވެސް އެމްޓީޔޫސީން ހުށަހެޅި އިސްލާހުގައި ހިމަނާފައިވެއެވެ.