މޫސުން ވަރަށް ގޯސްވެ ރާއްޖޭގެ ބޮޑު ސަރަހައްދުތަކަށް ޔެލޯ އެލާޓް ނެރެފި

ރާއްޖޭގެ ބޮޑި ބަޔަކަށްވަނީ ރީދޫ ސަމާލު ނެރެފައި

ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރަ މިއަދު އިތުރަށް ގަދަވެ، ދެކުނުގެ ދެ އަތޮޅު ފިޔަވައި އެހެން ހުރިހާ ސަރަހައްދަކަށް މޫސުމާބެހޭ ޤައުމީ މަރުކަޒުން ވަނީ ޔެލޯ އެލާޓް ނެރެފައެވެ.

މިދިޔަ ހަފްތާގައި މޫސުމާބެހޭ ޤައުމީ މަރުކަޒުން ވަނީ އާދީއްތަ ދުވަހުން ފެށިގެން ފަސް ދުވަހަށް މޫސުން ވަރަށް ބޮޑަށް ގޯސްވާނެ ކަމަށް އަންގާފައެވެ. އެހެންނަމަވެސް އިއްޔެ ބަނަކޮށްލުމަށްފަހު ވިއްސާރަ ކުރަން ފަށާފައިވަނީ މިއަދުއެވެ. މިގޮތުން ބައެއް ސަރަހައްދުތަކަށް ރޭ ދަންވަރުން ފެށިގެން މެދުނުކެނޑި ބޯކޮށް ވާރޭ ވެހެމުންދާކަމަށް ވެއެވެ.

މޫސުމާބެހޭ ޤައުމީ މަރުކަޒުން މަޢުލޫމާތު ދީފައިވާ ގޮތުގައި މިއަދު ހެނދުނު 5:30 އިން ފެށިގެން 9:00 އާ ހަމައަށް ޔެލޯ އެލާޓް ދެމިއޮންނާނެއެވެ. މި މުއްދަތުގައި ބޯކޮށް ވާރޭވެހި، ގުގުރާނެ ކަމަށާއި، ވިލާގަނޑުގައި ގަޑިއަކު 45 މޭލުގެ ބާރުމިނުގައި ވައި ޖެހި، ކަނޑުތައް ގަދަވާނެ ކަމަށް ވެއެވެ. ޚާއްޞަކޮށް އުތުރާއި މެދުރާއްޖޭގެ ކަނޑުތައް ގަދަވެ، މި ސަރަހައްދުތަކުގައި ރާޅުގެ އުސްމިން 5-7 ފޫޓާ ދެމެދުގައި ހުންނާނެ ކަމަށް އެ މަރުކަޒުން ބުނެފައިވެއެވެ.

މި ނުރައްކާތެރި މޫސުމުގައި ކަނޑުދަތުރުފަތުރު ކުރާ ފަރާތްތަކުން ސަމާލުވުމަށް ސަރުކާރުގެ ކަމާބެހޭ އިދާރާތަކުން އިލްތިމާސްކޮށްފައިވެއެވެ.

މޫސުން