ޚާރިޖީ ވަޒީރު މޫސާ ޒަމީރު ބަހުރެއިނަށް ކުރައްވާ ރަސްމީ ދަތުރުފުޅެއް ފައްޓަވައި

ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު ބަހުރެއިނަށް ކުރައްވާ ރަސްމީ ދަތުރުފުޅެއް ފައްޓަވައި ފިއެވެ.

ދަތުރުފުޅަކީ ބަހުރެއިނުގެ ޚާރިޖީ ވަޒީރު ޑރ. އަބްދުއްލަޠީފް ބިން ރަޝީދު އަލް ޒަޔާނީގެ ދަޢުވަތަކަށް ކުރައްވާ ދަތުރުފުޅެކެވެ.

މިމަހުގެ 11 އިން 15 އޯގަސްޓަށް ހަމަޖެހިފައިވާ މި ދަތުރުފުޅުގައި ވަޒީރު ޒަމީރު ބަހުރެއިނުގެ ޚާރިޖީ ވަޒީރާ ބައްދަލުކުރައްވައި، ދެ ޤައުމުގެ ދެމެދުގައި އޮތް ޒަމާންވީ ގުޅުން މުރާޖަޢާކުރައްވައި، ދެ ޤައުމަށް ފައިދާހުރި ދާއިރާތަކުން އިތުރަށް އެއްބާރުލުން ދެވިދާނެ ގޮތްތަކާ މެދު މަޝްވަރާކުރައްވާނެއެވެ. މިއަހަރަކީ ދިވެހިރާއްޖެއާއި ބަހުރެއިނާ ދެމެދު ޑިޕްލޮމެޓިކް ގުޅުން ޤާއިމުކުރިތާ 44 އަހަރު ފުރޭ އަހަރެވެ.

މީގެ އިތުރުން، ވަޒީރު ޒަމީރު ބަހުރެއިނު ސަރުކާރުގެ އިސް ބޭފުޅުންނާވެސް ބައްދަލުކުރައްވާނެއެވެ. މީގެ ތެރޭގައި މާލިއްޔާ އަދި ޤައުމީ އިޤްތިޞާދުގެ ވަޒީރު، ތެލާއި ތިމާވެށީގެ ވަޒީރު އަދި ފަތުރުވެރިކަމުގެ ވަޒީރާ ބައްދަލުކުރައްވައި، އެކި ދާއިރާތަކުން ދެ ޤައުމުގެ ދެމެދުގައި އެއްބާރުލުން އިތުރުކުރެވިދާނެ ގޮތްތަކާ މެދު މަޝްވަރާކުރައްވާނެއެވެ.

މި ދަތުރުފުޅުގައި ވަޒީރު ޒަމީރުގެ އަރިހުގައި އެމްބެސެޑަރ އެޓް ލާޖް އަޙްމަދު ނަޞީރު، ސެކްރެޓަރީ، ބައިލެޓަރަލް ޑރ. ޙާލާ ޙަމީދު، ޖޮއިންޓް ސެކްރެޓަރީ މަރްޔަމް ރީޝާ އަދި އެސިސްޓަންޓް ޑިރެކްޓަރ މިޒްނާ ވަޙީދު ބައިވެރިވެވަޑައިގަންނަވައެވެ.