ޖައިޝަންކަރު ރާއްޖެއަށް ކުރެއްވި ތިން ދުވަހުގެ ދަތުރު ނިންމަވާލައްވައިފި

އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިޔަމް ޖައިޝަންކަރު ރާއްޖެއަށް ކުރެއްވި ތިން ދުވަހުގެ ރަސްމީ ދަތުރު ނިންމަވާލެއްވުމަށް ފަހު މިއަދު ފުރާވަޑައިގެންފި އެވެ.

މިދިޔަ ހުކުރު ދުވަހު ރާއްޖެ ވަޑައިގެންނެވި ޖައިޝަންކަރު ފުރާވަޑައިގަތީ އައްޑޫގައި އިންޑިއާގެ ލޯނުން ހަރަދުކޮށްގެން ކުރިއަށް ގެންދާ މަޝްރޫއުތަކުގެ ތެރެއިން މިހާރު ނިމިފައިވާ ދެ މަޝްރޫއު ދިވެހި ސަރުކާރާ ހަވާލު ކުރުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށް އައްޑުއަށް ވަޑައިގަތުމަށް ފަހު އެވެ.

ޖައިޝަންކަރު ރާއްޖެއަށް ކުރެއްވި ދަތުރުގައި ރައީސް މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައި ދެ ގައުމުގެ ގުޅުން ބަދަހި ކުރުމާ ގުޅޭ މަޝްވަރާތައް ކުރެއްވި އެވެ. މީގެ އިތުރުން ފޮރިން މިނިސްޓަރު މޫސާ ޒަމީރާ އެކު ވެސް ޖައިޝަންކަރު މަޝްވަރާތައް ކުރިއަށް ގެންދެވި އެވެ.

ރާއްޖެ އާއި އިންޑިއާގެ ވިޔަފާރި ގުޅުންތައް ހަރުދަނާ ކުރުމަށް އިކޮނޮމިކް މިނިސްޓަރު މުހައްމަދު ސައީދާ މަޝްވަރާ ކުރެއްވުމުގެ އިތުރުން ޖައިޝަންކަރުގެ ޝަރަފުގައި ފޮރިން މިނިސްޓަރު ޒަމީރު ދެއްވި ފަރިއްކޮޅެއްގައި ބައިވެރިވެވަޑައިގެންނެވި އެވެ.

ދަތުރުފުޅުގެ ތެރޭގައި ސަރުކާރުގެ 5 މިލިއަން ގަސް ޕްރޮގުރާމަށް އެއްބާރުލުން ދެއްވުމަށް މާލޭ ލޮނުޒިޔާރަތް ޕާކުގައި ގަހެއް އިންދެވުމާއި އިންޑިއާގެ އެހީގައި ކުރިއަށްގެންދާ ތިލަމާލެ ބްރިޖު ސައިޓަށް ވަޑައިގެން، މަސައްކަތް ކުރިއަށް ދާ ގޮތް ބައްލަވާލެއްވި އެވެ. އަދި އިންޑިއާގެ އެހީގައި ރަށްރަށުގައި ކުރިއަށް ގެންގޮސްފައިވާ މަޝްރޫއުތަކެއް އިފްތިތާހުކޮށްދެއްވުމުގެ އިތުރުން އިދިކޮޅު އެމްޑީޕީގެ އިސް ބޭފުޅުންނާ ބައްދަލުކުރެއްވި އެވެ.