މާލޭގެ މަގުތައް ތަރައްޤީކުރުމުގެ މަޝްރޫޢުން ބިމު އަޑީގެ ނެޓްވޯކްތައް ތަރުތީބުކުރެވޭނެ: ރައީސް މުޢިއްޒު

މާލޭގެ މަގުތައް ތާރުއަޅައިގެން ތަރައްޤީކުރުމުގެ މަޝްރޫޢުގެ ދަށުން ބިމު އަޑީގައި ހުރި ފެނާއި ނަރުދަމާ އަދި އެހެނިހެން ނެޓްވޯކްތައް ތަރުތީބުކުރެވި، މުސްތަޤުބަލުގައި މަގުތައް އަލުން ރޫޅާލަންޖެހޭ ހާލަތްތައް މަދުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ބޭއްވުނު މާލެ ސިޓީ ކައުންސިލްގެ 4 ވަނަ ދައުރުގެ 1 ވަނަ ޖަލްސާގައި ބައިވެރިވެވަޑައިގެން ވާހަކަފުޅު ދައްކަވަމުންނެވެ.

"ފެނާއި ނަރުދަމާއާއި ކަރަންޓާއި އެކި ކަހަލަ ސަރވިސް ކޭބަލްތައް، ނެޓްވޯކް އައު ކުރެވި ނޫނީ ތަރުތީބުކުރެވިގެން، މަގުތައް ހަދާ ނިމުމުން އަލުން ރޫޅަން ޖެހޭ މިންވަރު މަދުވާނެ ގޮތަކަށް، ޑީވޯޓަރިން ނިޒާމް، ފަޔާ ހައިޑްރަންޓު ނިޒާމް މަގުތައް ހެދިގެންދާނެ ވަރަށް ގިނަ ހައްލުތަކާއެކު،" ރައީސް ވިދާޅުވިއެވެ.

ރައީސް މުޢިއްޒު ވިދާޅުވީ މާލޭގެ މަގުތަކާއި ވިލިމާލޭގެ ހުރިހާ މަގުތައް ހެދުމަކީ ސަރުކާރުން ކުރިއަށްގެންދާނެ މުހިންމު މަޝްރޫޢެއް ކަމަށެވެ. މި މަޝްރޫޢު ކުރިއަށްގެންދަނީ ޗައިނާގެ ހިލޭ އެހީގައި ކަމަށް ފާހަގަކުރައްވައި، މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު މި މަޝްރޫޢުގެ އަމަލީ މަސައްކަތްތައް ފެށުމަށް އަމާޒުކުރައްވާފައިވާ ކަމަށް ވިދާޅުވިއެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢު ކުރިން ނިންމާފައި އޮތީ ސަރުކާރުގެ ބަޖެޓުގެ ތެރެއިން ކުރިއަށް ގެންދިއުމަށެވެ. ނަމަވެސް ރައީސް މުޢިއްޒު މިއަހަރު ޖެނުއަރީ މަހު ޗައިނާއަށް ކުރެއްވި ދަތުރުފުޅުގެ ތެރެއިން، މި މަސައްކަތް ޗައިނާއިން ރާއްޖެއަށް ދޭ ހިލޭ އެހީގެ ގޮތުގައި ކުރިއަށްގެންދިއުމަށް ވަނީ ނިންމަވާފައެވެ.

މާލޭ މަގުތަކުގައި ތާރުއެޅުމުގެ މަސައްކަތް ފުރަތަމަ ފެށީ ރައީސް މުޢިއްޒު، ހައުސިން މިނިސްޓަރުކަމުގައި ހުންނެވިއިރުއެވެ. އޭރު އިންޑަސްޓްރިއަލް ވިލެޖު ސަރަޙައްދުން ފެށިގެން މާލޭގައި ހުންނަ އެމްޓީސީސީ ފެރީ ޓަރމިނަލްއާ ހަމައަށް ވަނީ ތާރު އަޅާފައެވެ. ނަމަވެސް ނިމިދިޔަ ސަރުކާރުގައި ބޮޑުތަކުރުފާނު މަގުގެ އިތުރު ސަރަޙައްދެއް ޒަމާނީ ފެންވަރަށް ތަރައްޤީކޮށްފައެއް ނުވެއެވެ.

މިހާރު މި މަޝްރޫޢުގެ ދަށުން މާލޭގެ ހުރިހާ މަގުތަކެއް ތަރައްޤީކުރުމަށް ވަނީ ރޭވިފައެވެ. މިއީ މާލޭގެ މަގުތަކުގެ އިތުރުން ވިލިމާލޭގެ މަގުތައްވެސް ހިމެނޭ ގޮތަށް ކުރިއަށްގެންދެވޭ ފުޅާ މަޝްރޫޢެއްކަން ފާހަގަކުރެވެއެވެ. މި މަޝްރޫޢުގެ ސަބަބުން މާލެ ސިޓީގެ މަގުތަކުގެ ފެންވަރު ރަނގަޅުވެ، ދަތުރުފަތުރު ފަސޭހަވުމުގެ އިތުރުން ޢުމްރާނީ ގޮތުން މާލެ ސިޓީ އިތުރަށް ތަރައްޤީވެގެންދާނެ ކަމަށް އުންމީދުކުރެވެއެވެ.