މާލީ ކުންފުނިތަކުގެ ބޯޑުތަކަށް ސިޔާސީ މީހުން އައްޔަންކުރެވޭގޮތަށް ގަވާއިދަށް ބަދަލު ގެނެސްފި

ބޭންކުތަކާއި އިންޝުއަރެންސް ކުންފުނިތަކުގެ އަދި މާލީ ކުންފުނިތަކުގެ ބޯޑުތަކުގައި ސިޔާސީ މަޤާމުތަކުގައި ތިބޭ ފަރާތްތައް އައްޔަންކުރެވޭގޮތަށް ގަވާއިދަށް ބަދަލު ގެނެސްފިއެވެ.

މި ބަދަލު ގެނެސްފައިވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ގެޒެޓްކޮށްފައިވާ އިޞްލާޙަކުންނެވެ.

މި އިޞްލާޙާ އެކު، ކެބިނެޓް މިނިސްޓަރުންނާއި މިނިވަން މުއައްސަސާތަކުގެ ވެރިން އަދި ސިޔާސީ ޕާޓީތަކުގެ އިސް މަޤާމުތަކުގައި ތިބޭ ފަރާތްތައް ފިޔަވައި އެހެން ސިޔާސީ މަޤާމުތަކުގައި ތިބޭ ފަރާތްތަކަށް ބޭންކުތަކާއި އިންޝުއަރެންސް ކުންފުނިތަކުގެ އަދި މާލީ ޚިދުމަތްދޭ ކުންފުނިތަކުގެ ބޯޑުތަކަށް އައްޔަންކުރެވޭނެއެވެ.

މީގެ ކުރިން، މި ކުންފުނިތަކުގެ ބޯޑުތަކުގައި ނުތިބެވޭނެ ފަރާތްތަކުގެ ތެރޭގައި ސަރުކާރުގެ މިނިސްޓްރީތަކާއި މުއައްސަސާތަކުގެ ވެރިންގެ އިތުރުން، ސިޔާސީ ޕާޓީތަކުގެ އިސް މަޤާމުތަކުގައި ތިބޭ ފަރާތްތަކާއި ޤާނޫނުތަކުން ބާރު ލިބިގެން އުފައްދާފައިވާ މުއައްސަސާތަކުގެ ވެރިން ހިމެނެއެވެ.

މިއީ  އެމްއެމްއޭގެ އައު ގަވަރުނަރު އަޙްމަދު މުނައްވަރު މަޤާމާ ހަވާލުވެވަޑައިގަތުމަށްފަހު، އެމްއެމްއޭ އަކީ ޒަމާނީ ސެންޓްރަލް ބޭންކަކަށް ބަދަލުކުރުމުގެ ބޭނުމުގައި ގެނެސްފައިވާ ބަދަލެކެވެ.