ރައީސްގެ ހަރިޖީ ސިޔާސަތުގެ ދަށުން ކުރިމަގު ފެންނަނީ އުޖާލާކޮށް: އަބްދުއްރަހީމް
ރައީސް ޑރ މުޢިއްޒު އިންޑިޔާގެ އެކްޓާނަލް އެފެއާރޒް މިނިސްޓަރާއެކު
ރައީސް ޑރ. މުހައްމަދު މުއިއްޒު ގެންގުޅުއްވާ ހާރިޖީ ސިޔާސަތުގެ ސަބަބުން ރާއްޖޭގެ ކުރިމަގު ފެންނަނީ އުޖާލާކޮށް ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެއެވެ.
ރައީސް ޑރ. މުއިއްޒު، އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރާ ބައްދަލު ކުރައްވާ މަންޒަރު ފެންނަ ފޮޓޯތަކެއް ހިއްސާ ކުރައްވާ "އެކްސް" ގައި ކުރެއްވި ޕޯސްޓެއްގައި އަބްދުއްރަހީމް ވިދާޅުވީ ރައީސް ޑރ. މުއިއްޒު ގެންގުޅުއްވާ ހަރުދަނާ ހާރިޖީ ސިޔާސަތުގެ ސަބަބުން ދިވެހީންގެ ރާއްޖޭގެ ކުރިމަގު ފެންނަނީ ނިކަން އުޖާލާކޮށް ކަމަށެވެ. އަދި ރައީސް ޑރ. މުއިއްޒަށް ޝުކުރު ދަންނަވާ ކަމަށް ވެސް އަބްދުއްރަހީމް ވިދާޅުވިއެވެ.
"ގައުމާއި ރައްޔިތުންގެ ހައްގުގައި ތިޔަކުރައްވާ މަސައްކަތްޕުޅަށާއި ތިޔަ ދައްކަވާ ސާބިތުކަމަށް އައްސަރިބަހާ ސާބަސް ދަންނަވަން،" އަބްދުއްރަހީމް ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ރާއްޖެ އާއި އިންޑިއާއާ ދެމެދުގައި ވަރަށް ގާތް ގުޅުމެއް އުފެދިގެން ދިޔައެވެ. އެ ގުޅުން ވަރުގަދަވެ، އިންޑިއާ އިން މިދިޔަ ފަސް އަހަރު ދުވަހުގެ ތެރޭގައި އެކި ގޮތް ގޮތުން ވަނީ އެހީތެރިކަން ފޯރުކޮށްދީފައެވެ. ރައީސް ޑރ. މުއިއްޒު ވެރިކަމަށް ވަޑައިގެންނެވި އިރުގައި ވެސް އެ ގުޅުން ވަރަށް ވަރުގަދަ ކަމާ އެކީގައި އޮތެވެ.
އެކަމަކު، މި ސަރުކާރުގެ ތިން ޑެޕިއުޓީ މިނިސްޓަރަކު އިސްކޮށް ތިއްބަވައި އިންޑިއާއަށާއި މޯދީ އަށް ފުރައްސާރަކޮށް، ބަދު ބަސް ވިދާޅުވި މައްސަލައިގައި އިންޑިއާ އާއި ރާއްޖޭގެ ގުޅުން ވަރަށް ބޮޑަށް ހީނަރުވިއެވެ. އެ މައްސަލައިގައި އެ ޑެޕިއުޓީ މިނިސްޓަރުންނަށް ފިޔަވަޅު ވެސް އެޅިއެވެ.
ކޮމެންޓް