ފަހުވަގުތު އެއްވަރުކޮށް ޕެނަލްޓީން މޮޅުވެ، ސިޓީން އެފްއޭ ކޮމިއުނިޓީ ޝީލްޑް އުފުލާލައިފި

ފަހުވަގުތު އެއްވަރުކޮށް ޕެނަލްޓީން މޮޅުވެ، ސިޓީން އެފްއޭ ކޮމިއުނިޓީ ޝީލްޑް އުފުލާ ލައިފިއެވެ.

މެންޗެސްޓާރ ސިޓީން ޝީލްޑް ކާމިޔާބު ކޮށްފައިވަނީ ރޭ ވެމްބްލީ ސްޓޭޑިއަމްގައި ކުޅެވުނު ކޮމިޔުނިޓީ ޝީލްޑްމެޗުގައި މެންޗެސްޓަރ ޔުނައިޓެޑާ ކުރިމަތިލައި، ޕެނަލްޓީ ޝޫޓްއައުޓްގައި 7-6 އިން މޮޅުވެގެންނެވެ.

ރޭގެ މެޗުގެ ބޮޑުބައި ގޮސްފައި ވަނީ ދެ ޓީމުކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ނަމަވެސް 82 ވަނަ މިނެޓުގައި ޔުނައިޓެޑްގެ އަލެހަންޑްރޯ ގާނާޗޯ ލަނޑެއް ޖަހައި ލީޑު ނެގިއެވެ. އެހެންނަމަވެސް މެޗު ނިމުމާ ކައިރިވެފައި ވަނިކޮށް، 89 ވަނަ މިނެޓުގައި ސިޓީގެ ބެނާޑޯ ސިލްވާ ވަނީ ލިބުނު ހަނި ފުރުސަތެއްގައި ސިޓީއަށް ނަތީޖާ ހަމަހަމަ ކޮށްދީފައެވެ

ޕެނަލްޓީ ޝޫޓް އައުޓުގައި ސިޓީގެ ފުރަތަމަ ޕެނަލްޓީ ބެނާޑޯ ސިލްވާ ފޮނުވާލުމުން ކީޕަރު އަންޑްރޭ އޮނާނާ ދިފާއުކުރިއެވެ. ނަމަވެސް އޭގެފަހުން ކެވިން ޑީބްރޭނާ، އާލިން ހާލަންޑް، ސަވީނިއޯ، ކީޕަރު އެޑަސަން މޯރެސް، މެތިއުސް ނޫނޭޒް، ރުބެން ޑިއާޒް އަދި މެނުއެލް އަކަންޖީ ވަނީ ޕެނަލްޓީތައް ކާމިޔާބުކޮށްފައެވެ.

ޔުނައިޓެޑަށް ޕެނަލްޓީތައް ކާމިޔާބުކޮށްދިނީ ބްރޫނޯ ފެނާންޑޭޒް، ޑިއޯގޯ ޑަލޮޓް، އަލްހެންޑްރޯ ގާނާޗޯ، ކާލޯސް ކަސެމީރޯ، ސްކޮޓް މެކްޓޮމިނޭ އަދި ލިސަންޑްރޯ މާޓިނޭޒްއެވެ. ނާކާމިޔާބުވީ، ޖޭޑަން ސަންޗޯ ފޮނުވާލި އެޓީމުގެ ހަތަރުވަނަ ޕެނަލްޓީ އާއި ޖޯނީ އީވަންސް ފޮނުވާލި ފަހު ޕެނަލްޓީއެވެ.

މިއީ ސިޓީން އެފްއޭ ކޮމިއުނިޓީ ޝީލްޑް ކާމިޔާބުކުރި ހަތްވަނަ ފަހަރެވެ. އެންމެ ފަހުން މި ޝީލްޑް އެ ޓީމަށް ލިބިފައިވަނީ 2019 ވަނަ އަހަރުއެވެ. މިފަހަރުގެ ކާމިޔާބީއާއެކު، ވޭތުވެދިޔަ ތިން އަހަރު މި މުބާރާތުގައި ދިމާވި ނާކާމިޔާބީތަކަށް ސިޓީން ނިމުމެއް ގެނެސްފައިވެއެވެ.