އިންޑިއާގެ ހާރިޖީ ވަޒީރު ޖައިޝަންކަރު ތިލަމާލެ ބްރިޖު ބައްލަވައިލައްވައިފި

ޖައިޝަންކަރު ތިލަމާލެ ބުރިޖު ބައްލަވަލެއްވުމުގެ ތެރެއިން / ފޮޓޯ:އެކްސް

އިންޑިއާގެ ހާރިޖީ ވަޒީރު ޖައިޝަންކަރު ދިވެހިރާއްޖެއަށް ކުރައްވަމުންދާ ރަސްމީ ދަތުރުފުޅުގައި، ގްރޭޓަރ މާލެ ކަނެކްޓިވިޓީ ބްރިޖު ނުވަތަ ތިލަމާލެ ބްރިޖުގެ މަސައްކަތް ކުރިއަށްދާ ގޮތް މިއަދު ބައްލަވައިލައްވައިފިއެވެ.

މި ބްރިޖަކީ މާލެ، ވިލިމާލެ، ގުޅީފަޅު އަދި ތިލަފުށި ގުޅުވާލުމަށް އެޅެމުންދާ ބްރިޖެކެވެ. މިއީ އިންޑިއާގެ އެފްކޮންސް ކުންފުންޏާ ހަވާލުކޮށްގެން، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ފެށި މަޝްރޫޢެކެވެ. ޖައިޝަންކަރު ވިދާޅުވެފައިވަނީ މި މަޝްރޫޢުގެ ސަބަބުން ރަށްތަކުގެ ގުޅުން ބަދަހިވެ، އިޤްތިޞާދަށް ފައިދާތަކެއް ކުރާނެ ކަމަށެވެ.

އިންޑިއާގެ އެގްޒިމް ބޭންކުން ދޫކުރި ލޯނަކުން ހިންގާ މި މަޝްރޫޢު އެފްކޮންސްއާ ހަވާލުކޮށްފައިވަނީ ދެ މަރުހަލާއަކަށް ބަހާލައިގެންނެވެ. 6.7 ކިލޯމީޓަރުގެ މި ބްރިޖުގެ މަސައްކަތް ނިންމުމަށް މިހާރު ލަފާކުރެވެނީ 2026 ވަނަ އަހަރުގެ ސެޕްޓެމްބަރު މަހުގެ ނިޔަލަށެވެ.

ޖައިޝަންކަރުގެ ދަތުރުފުޅުގެ ތެރޭގައި މާދަމާ އައްޑޫ ސިޓީއަށް ވަޑައިގަންނަވާ ގޮތަށް ހަމަޖެހިފައިވެއެވެ. އެ ދަތުރުފުޅުގައި އައްޑޫގައި އެފްކޮންސްއިން ނިންމާފައިވާ، ގުޅިފައިވާ ރަށްތަކާއި ހަންކެޑެ ގުޅުވާލާ ބްރިޖު ރަސްމީކޮށް ހުޅުވައިދެއްވުމަށް ވެސް ހަމަޖެހިފައިވެއެވެ.

ޖައިޝަންކަރުގެ މި ދަތުރުފުޅުގައި މިއަދުވަނީ ރައީސުލްޖުމުހޫރިއްޔާ ޑރ. މުހައްމަދު މުއިއްޒާއި ބައްދަލުކުރައްވާ ރަސްމީ ވާހަކަފުޅުތައްވެސް ބާއްވަވާފައެވެ.

ރާއްޖެ އިންޑިޔާ އިންޑިޔާ ތިލަމާލެ ބްރިޖް