ޕީ.އެން.ސީ އަށް މެމްބަރުން އިތުރު ކުރަނީ

ޕީޕަލްސް ނޭޝަނަލް ކޮންގްރެސް (ޕީ.އެން.ސީ) އިން މާލެ އާއި ވިލިމާލޭގައި ފުޅާ ދާއިރާއެއްގައި މެމްބަރުން ވެއްދުމުގެ މުހިންމު ޕްރޮގްރާމެއް ފަށައިފިއެވެ. ޕީ.އެސް.އެމް ނިއުސްއަށް މަޢުލޫމާތު ދެއްވަމުން، ޕީ.އެން.ސީގެ ސެކްރެޓަރީ ޖެނެރަލް ޒީނާޒް ޢަދުނާން ވިދާޅުވީ މި ޕްރޮގްރާމްގެ މައިގަނޑު މަޤްޞަދަކީ ޕާޓީއަށް ގުޅުމަށް ޝައުޤުވެރިވާ އަދި މިހާތަނަށް ނުގުޅި ތިބި ފަރާތްތައް ޕާޓީއާ ގުޅުވުން ކަމަށެވެ. އަދި މި މަސައްކަތް ކުރިއަށްދާނީ ހަރުދަނާ މަރުޙަލާތަކަކަށް ބަހާލައިގެން ކަމަށާއި، މީގެ ތެރޭގައި ގޭގެއަށް ޒިޔާރަތްކޮށް ފޯމު ފުރުވުންފަދަ ޙަރަކާތްތައް ހިމެނޭ ކަމަށްވެސް އޭނާ ވިދާޅުވިއެވެ.

މީގެ އިތުރުން، މި ޕްރޮގްރާމް ރާއްޖޭގެ އެހެން އަތޮޅުތަކަށްވެސް ފުޅާކުރުމުގެ ރޭވުންތައް ވަނީ ކުރެވިފައެވެ. ޕާޓީގެ އަމާޒަކީ ދިވެހިރާއްޖޭގެ އެންމެ ބޮޑު ސިޔާސީ ޕާޓީއަށް ވުން ކަމަށް ޒީނާޒް ފާހަގަކުރެއްވިއެވެ. އަދި މި އަމާޒު ޙާޞިލްވަންދެން ދެމެހެއްޓެނިވި ގޮތެއްގައި މަސައްކަތް ކުރިއަށް ގެންދާނެ ކަމަށްވެސް އޭނާ ވިދާޅުވިއެވެ.

މިހާރު އިލެކްޝަންސް ކޮމިޝަނުގައި ރަޖިސްޓްރީ ކުރެވިފައިވަނީ 11 ސިޔާސީ ޕާޓީއެވެ. އެންމެ ގިނަ މެމްބަރުން ތިބި ޕާޓީއަކީ 50,980 މެމްބަރުންނާއެކު މޯލްޑިވިއަން ޑިމޮކްރެޓިކް ޕާޓީ (އެމް.ޑީ.ޕީ) އެވެ. ދެވަނައަށް އެންމެ ގިނަ މެމްބަރުން ތިބީ 34,827 މެމްބަރުންނާއެކު ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) ގައެވެ. ޕީ.އެން.ސީ ވަނީ 28,704 މެމްބަރުންނާއެކު ސަފުގެ ތިންވަނައިގައެވެ.

ޕީއެންސީ