ކަރެކްޝަންސްގެ 13 އޮފިސަރުންގެ މައްޗަށް ދައުވާކުރުމަށް ޕީޖީ އޮފީހަށް ފޮނުވައިފި

ޖަލުގައި ތިބޭ ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވެދިން ކަމުގެ ތުހުމަތުގައި ހައްޔަރުކުރެވުނު ކަރެކްޝަންސްގެ 13 އޮފިސަރުންގެ މައްޗަށް ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލް (ޕީޖީ) އޮފީހަށް މިއަދު ފޮނުވައިފިއެވެ.

ފުލުހުން މިއަދު ބުނި ގޮތުގައި، މި 13 އޮފިސަރުންގެ ތަޙުޤީޤުތައް ނިންމައި، އެ މީހުންގެ މައްޗަށް ދައުވާކޮށްދިނުމަށް އެދި ޕީޖީ އޮފީހަށް ފޮނުވީ މިއަދުއެވެ.

މިދިޔަ ޖޫން މަހު ފުލުހުން ބޭއްވި ނޫސްވެރިންގެ ބައްދަލުވުމެއްގައި ހާމަކުރި ގޮތުގައި، ކަރެކްޝަންސްގެ ދަށް ލެވެލްގެ 18 އޮފިސަރެއްގެ އެކައުންޓަށް ޝައްކުކުރެވޭ 73 މިލިއަން ރުފިޔާ ވަނީ ޖަމާކޮށްފައެވެ. މި ފައިސާ ޖަމާކޮށްފައިވަނީ ޖަލުގައި ތިބި ގައިދީންނާއި އެ މީހުންނާ ގުޅުން ހުރި މީހުންގެ އެކައުންޓްތަކުންނެވެ.

މި މައްސަލައިގައި ޝާމިލުވާ މީހުން ހައްޔަރުކުރުމުގެ އޮޕަރޭޝަނެއް ފުލުހުން ފަށައި، މިހާތަނަށް ކަރެކްޝަންސްގެ 13 އޮފިސަރަކު ވަނީ ހައްޔަރުކޮށްފައެވެ. އަދި މައްސަލަ ތަހުގީގު ކުރުމަށް ފަހު ދައުވާކޮށްދޭން ޕީޖީ އޮފީހަށް ފޮނުވައި ފުލުހުން ވަނީ އެ އޮފިސަރުންގެ ވަނަވަރު ވެސް އާއްމުކޮށްފަ އެވެ.

ދައުވާކުރަން ފޮނުވި 13 އޮފިސަރުން

ފ. ނިލަންދޫ، ހަވޭލި، މާޒިން ހަމީދު، 22

ރ. އުނގޫފާރު، އައިވަރީ ހައުސް، ޖިނާހް އަބްދުއްރަހީމް، 29

ގއ. ވިލިނގިލީ، ކުއްޅަވަށްގެ، މުހައްމަދު ފަތޫހް، ފަތުހުﷲ، 24

ކ، މާފުށި ބީޗްހައުސް، އަލީ ހިޝާމް، 33

ގ. އިވްނިންސްޓާ، މުހައްމަދު ނަބްހާން، 30

މ. މޭދާ، މުހައްމަދު ނަބީލް އިބްރާހީމް، 21

ހދ.ނޭކުރެންދޫ، ތަރާނާ، އަލީ ނާޒިމް، 36

ކ. މާފުށި، މާވިނަ، ޒަޔާން އަހްމަދު، 23

ރ. މީދޫ، ހިޖާޒް، ޔާމީން ހުސެއިން 23

ށ. ފޯކައިދޫ، ފަހާގެ، އަހްމަދު ޝަމާލް، 24

ށ. ފޯކައިދޫ، ދަނބުމާގެ، މުހައްމަދު ރިމާޒް، 29

ނ. ލަންދޫ، ކާމިނީގެ، އަލީ އަޝްފާގު، 32

ކ. ކާށިދޫ، ބިންމަތީގެ، އަހްމަދު އަނޫފް، 27

މި މައްސަލައިގެ އޮޕަރޭޝަންތައް ފުލުހުން ފެށީ އިންޓެލިޖެންސަށް ލިބުނު މަޢުލޫމާތަކާ ގުޅިގެންނެވެ. މިހާތަނަށް ބެލިބެލުމުން މި މައްސަލައިގައި ހިމެނޭ ހަ މީހަކު މިދިޔަ އަހަރު ވަޒީފާއިން ވަކިވެފައިވާ ކަމަށް ހޯމް މިނިސްޓަރު އަލީ އިހުސާން މީގެ ކުރިން ވިދާޅުވެފައިވެއެވެ.

ހޯމް މިނިސްޓަރު އަލީ އިހުސާން ވިދާޅުވެފައިވާ ގޮތުގައި، ޔުނީފޯމު އެޅި އެއްވެސް އޮފިސަރަކު އޭނާގެ މަޤާމުގެ ނުފޫޒާއި ލިބިފައިވާ އިމްތިޔާޒުތަކުގެ ބޭނުންކޮށްގެން ފައިސާ ނަގައި ފައިސާއަށްޓަކައި އެ މީހާގެ ޔުނީފޯމު ވިއްކާލައިފި ނަމަ، އެފަދަ މައްސަލަތަކުގައި ހަރުކަށި ފިޔަވަޅު އަޅުއްވާނެއެވެ.