އޮލިމްޕިކްސް ފައިނަލުގައި ފޯރިގަދަ ކުޅުމަކަށްފަހު ސްޕެއިން އިން ފްރާންސް ބަލިކޮށްފި

ޕެރިސްގައި ކުރިއަށްދާ އޮލިމްޕިކްސް މެންސް ފުޓްބޯޅައިގަ ފޯރިގަދަ ކުޅުމަކަށްފަހު 3-5 ގެ ނަތީޖާއަކުން ފްރާންސް ބަލިކުރުމަށްފަހު ސްޕެއިން އިން ރަން މެޑަލް ހޯދައިފިއެވެ.

މެޗުގެ ފުރަތަމަ ގޯލު ފެނިގެންދިޔައީ ފްރާންސް ޓީމުގެ ފަރާތުންނެވެ. މި ގޯލު ކާމިޔާބުކޮށްދިނީ މިލޮޓްއެވެ. ފްރާންސްގެ ގޯލަށްފަހު ސްޕެއިން ޓީމުގެ ކުޅުން ވަރުގަދަކޮށް ފުރަތަމަ ހާފު ނިމުމުގެ ކުރިން 3 ގޯލު ކާމިޔާބުކުރިއެވެ. ފުރަތަމަ ދެ ގޯލުވެސް ޖަހައިދިނީ މުބާރާތުގައި ސްޕެއިންއަށް މޮޅު ކުޅުމެއް ދެއްކި ފާރމިން ލޯޕެޒްއެވެ. ތިންވަނަ ގޯލު ކާމިޔަބުކޮށްދިނީ އަލެހާންޑްރޯ ބައޭނާ އެވެ.

ދެވަނަ ހާފު ފަށައި ފްރާންސްގެ ކޯޗު ތިއަރީ އޮންރީ ވަނީ ޓީމަށް ބަދަލުތަކެއް ގެނެސް ސްޕެއިން ފަހަތަށް ޖައްސާލައިފައެވެ. ނަތީޖާއެއްގެ ގޮތުން 79 ވަނަ މިނެޓުގައި އަކިޔޫޝްގެ ގޯލާއިއެކު ފްރާންސް އަށް އުއްމީދު އާވެގެންދިޔައެވެ. އަދި މެޗުގެ ފުރިހަމަ ވަގުތު ހަމަވެގެން ލިބުނު އިތުރު ވަގުތުގައި ފްރާންސް އަަށް ލިބުނު ޕެނަލްޓީ މަޓެޓާ ކާމިޔާބުކޮށް މެޗުގެ ނަތީޖާ އެއްވަރު ކުރިއެވެ.

މެޗުގެ އިތުރު ވަގުތު ފަށައި ސްޕެއިން އިން ވަނީ ފްރާންސްގެ މައްޗަށް އަނެއްކާވެސް ކުރި ހޯދައިފައެވެ. މި ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ނިކުތް ސާރޖެއޯ ކަމޭލޯ ޕެރެޒްއެވެ. ކަމޭލޯ ވަނީ މެޗު ނިމެން ގާތްވެފައި ވަނިކޮށް އިތުރު ގޯލެއް ކާމިޔާބުކޮށްދީ ފްރާންސްގެ އުއްމީދުތައް ފުނޑުކޮށްލާފައެވެ. ސްޕެއިން އާއި ފްރާންސް އިން ޔޫރޯ 2024 ގެ ސެމީ ފައިނަލުގައި ކުޅުނު މެޗުވެސް ސްޕެއިން އިން ވަނީ 1-2 ގެ ނަތީޖާއަކުން ކާމިޔާބުކޮށްފައެވެ.